काठमाडौं । राष्ट्रिय खेलकुद परिषद् (राखेप)ले ९ देखि १२ वर्ष उमेर समूहका बालबालिकालाई खेलप्रति आकर्षित गर्न सातै प्रदेशमा एन्थ्रोपोमेट्रिक टेस्ट गर्ने भएको छ । नेपाली खेलकुदको इतिहासमै पहिलोपटक एन्थ्रोपोमेट्रिक टेस्टमार्फत खेलाडी छनोट हुन लागेको  हो ।

आठ वर्षे योजनाअनुसार स्पोर्टस फर फ्युचर (एसएफएफ) कार्यक्रमको सुरुवात गरिएको हो । ओलम्पिक सम्मको सहभागितालाई लक्ष्य राखेर शारीरिक बनोट र क्षमताको परीक्षणमार्फत खेलाडी छनोट कार्यक्रम सुरुवात गरिएको परिषद्का सदस्य सचिव टंकलाल घिसिङले बताए ।

एन्थ्रोपोमेट्रिक टेस्ट कोसी प्रदेशको इलाममा मंसिर १८–१९ र विराटनगरमा मंसिर २१–२२, मधेस प्रदेशको धनुषामा मंसिर २४–२५ र वीरगन्जमा मंसिर २७–२८, वाग्मती प्रदेशको भक्तपुरमा मंसिर ३०–पुस १ र चितवनमा पुस ३–४ तथा गण्डकी प्रदेशको पोखरामा पुस ६–७ र म्याग्दीमा पुस ९–१० गतेसम्म हुनेछ ।

सुदूरपश्चिम प्रदेशको कञ्चनपुरमा मंसिर १८–१९ र टीकापुरमा मंसिर २१–२२, कर्णाली प्रदेशको सुर्खेतमा मंसिर २६–२७ र सल्यानमा मंसिर २९–३० तथा लुम्बिनी प्रदेशको बर्दियामा मंसिर २३–२४ र दाङको बेल्झुण्डीमा पुस २–३ गतेसम्म सञ्चालन हुनेछ ।

सातै प्रदेशबाट समान १०–१० उत्कृष्ट बालबालिका छनोट गरी पहिलो वर्ष सामान्य तालिममा समावेश गरिनेछ । पहिलो वर्ष बालबालिकालाई मोटर सिपहरू जस्तै; गति, बल, समन्वय, लचकता र सहनशीलतामा सुधार ल्याउने उद्देश्यसहित सामान्य शारीरिक विकासमा ध्यान दिइने छ ।

दोस्रो वर्ष बालबालिकाको शारीरिक संरचना, मोटर सिप विकास र व्यक्तिगत चासोको आधारमा उनीहरूलाई विशेष खेलमा खेलकुद विज्ञानमा आधारित रहेर प्रशिक्षण दिने तथा खेल विज्ञानको सहायतामा पोषण, मनोविज्ञान र रिकभरी रणनीति बारे प्रशिक्षण प्रदान गरिनेछ । एक ओलम्पिक चक्रपछि पनि सम्बन्धित खेलको क्षमता प्रदर्शनमा सुधार नआएमा खेलाडीलाई निरन्तरता दिइने छैन ।

राखेपले छनोट भएका बालबालिकालाई आवास, अध्ययन, दैनिक खेलकुद तालिम, पोषण र स्वास्थ्य सेवा, खेल मनोवैज्ञानिक र फिजियोथेरापिस्ट सहायता र चोटपटक रोकथाम रणनीतिसम्बन्धी सेवा उपलब्ध गराउनेछ ।