नयाँ दिल्ली । छत्तीसगढ र तेलंगनाको सिमानामा पर्ने मुलुगु जिल्लामा सात संदिग्ध माओवादीको मृत्यु भएको दाबी गरेको छ । तेलंगना प्रहरीका अनुसार, प्रहरीले सुराकीका आधारमा सशस्त्र लडाकुको खोजी गरिरहेको समयमा ‘ग्रेहाउन्ड’का जवान र भारतीय माओवादी समूह (नक्सलवादी)बीच मुठभेड भएको हो । 

घटनास्थलबाट दुईथान एके–४७, एक इन्सास राइफलका साथै अरू हातहतियार, विस्फोटक पदार्थ र दैनिक उपभोग्य सामग्री बरामद गरिएको प्रहरीले जनाएको छ ।

मुलुगुको चालापाका वनक्षेत्रमा बिहान ५ः३० बजे सन्दिग्ध माओवादी लडाकुसँग सुरक्षाकर्मीको मुठभेड भएको थियो । एक घण्टाभन्दा बढी चलेको मुठभेडमा सात लडाकु मारिएका हुन् ।

उक्त क्षेत्रमा अझै खोजीकार्य जारी रहेको प्रहरीले जनाएको छ । प्रहरीका अनुसार, अरू केही माओवादी घाइते भएका हुन सक्ने अनुमान गरिएको छ । रासस/एएफपी