काठमाडौं । गरुड ग्रुप अफ कम्पनिजअन्तर्गतका दुई कम्पनी सामाजिक सुरक्षा कोष (एसएसएफ)बाट सम्मानित भएका छन् ।

सातौं सामाजिक सुरक्षा दिवस, २०८१ को अवसरमा नेपाल स्तरीय औद्योगिक क्षेत्र वर्गीकरणअन्तर्गत प्रशासनिक तथा सहयोगी सेवा सम्बन्धी क्षेत्रबाट सबैभन्दा बढी रकम योगदान गर्ने र योगदानकर्ता जोड्ने कम्पनीका रुपमा सम्मानित भएका हुन् ।

ग्रुप अन्तर्गतको गरुड सेक्युरिटी आउट सोर्सिङतर्फ सबैभन्दा धेरै योगदानकर्ता जोड्ने कम्पनीका रुपमा सम्मानित भएको हो । गरुड सेक्युरिटीजले एसएसएफबाट यो सम्मान निरन्तर तेस्रो वर्ष प्राप्त गरेको हो । यसले आफ्ना कर्मचारीको सुविधा तथा सुरक्षाप्रतिको प्रतिवद्धतालाई झल्काएको कम्पनीको भनाइ छ ।

ग्रुपको अर्काे कम्पनी गरुड सर्पोट सर्भिसेसले आउट सोर्सिङतर्फ सबैभन्दा धेरै रकम योगदान गर्ने कम्पनीको सम्मान पाएको हो ।

सामाजिक सुरक्षा दिवसका अवसरमा मंगलबार प्रधानमन्त्री केपी शर्मा ओलीले गरुड सेक्युरिटिजका प्रबन्ध निर्देशक सबलचन्द्र शाहलाई सम्मानपत्र प्रदान गरेका हुन् ।

सन् २००५ देखि सेवा दिन थालेको गरुड ग्रुपअन्तर्गतका कम्पनीले सुरक्षा गार्ड, सवारी चालक, सफाई, प्राविधिक सर्पोटलगायत क्षेत्रमा दोस्रो कम्पनीलाई कामदार उपलब्ध गराउँदै आएको छ ।