काठमाडौं । श्रम, रोजगार तथा सामाजिक सुरक्षामन्त्री शरत्‌सिंह भण्डारीले वैदेशिक रोजगारीमा जाने श्रमिकहरू मिटरब्याजीहरूको 'ट्रयाप'मा पर्ने गरेको बताएका छन् । 

मंगलबार सातौँ सामाजिक सुरक्षा दिवसका अवसरमा काठमाडौंमा आयोजित समारोहलाई सम्बोधन गर्दै उनले वैदेशिक रोजगारीमा जाने श्रमिकहरूलाई बैंकहरूले ऋण नदिँदा उनीहरू ‘डेप्थ ट्रयाप’मा पर्ने गरेको बताए । 

उनले वेदैशिक रोजगारीमा गएका श्रमिकहरू ऋणको भारमा पर्ने र बाकसमा फकिर्नुपर्ने गम्भीर स्थिति सिर्जना भएको भन्दै वर्तमान सरकार यसका लागि काम गरिरहेको उल्लेख गरे । नेपालको श्रमिक बजारमा बर्सेनि पाँच लाख श्रमिक आउने गरेको भए पनि एक लाख श्रमिकलाई मात्र रोजगारी दिनसक्ने अवस्था रहेको बताए । 

उनले वैदेशिक रोजगारीको विकल्प आन्तरिक रोजगारी नै भएको बताउँदै वैदेशिक रोजगारीमा जानुपर्ने बाध्यता रहुन्जेल त्यसलाई व्यवस्थित र सुरक्षित बनाउनुपर्ने बताए ।

उनले भने, "वैदेशिक रोजगारीमा गएका श्रमिकहरू दुई वटा ट्रयापमा पर्ने गर्नुभएको छ । एउटा, डेप्थ ट्रयाप । यो भनेको मिटरब्याजको जुन कुराहरू उठिरहेका छन् । उनीहरू मिटरब्याजीहरूको ट्रयापमा परेका छन् । अर्को, डेथ ट्रयाप । हाम्रा श्रमिकहरू त्यहाँ रोजगार गर्न गएका हुन् उनीहरू लडाइँ लड्न गएका होइनन् । लड्न गएका भए त्यहाँ विरगति प्राप्त गरे भन्ने कुरा हुन्थ्यो । वैदेशिक रोजगारीमा गएका श्रमिकहरु बाकसमा किन फर्किरहेका छन् ?"

उनले सरकारले मौद्रिक नीतिमा वैदेशिक रोजगारीमा जान श्रमिकहरूलाई बिनाधितो ऋण दिने नीति लिएको बताए ।