सिड्नी । चर्चित गायक दाजुभाइ सत्यराज र स्वरूपराज आचार्य अस्ट्रेलियाको सिड्नीमा गुन्जिने भएका छन् । आउँदो डिसेम्बर ६ मा फ्लेभर्स अफ नेपालको आयोजनामा सिड्नीको ग्रयानभिलस्थित टाउन हलमा ‘द सत्य स्वरूप शो’ हुन लागेको हो ।

फ्लेभर्स अफ नेपालका राजेश केसीले कार्यक्रमको तयारी करिब पूरा भएको जानकारी दिए । सिड्नीमा हुने शोपछि यो कार्यक्रम डिसेम्बर ९ मा न्यु क्यासल, डिसेम्बर १५ मा क्यानबेरा र डिसेम्बर १६ मा ओलगंगमा उनीहरूको सांगीतिक प्रस्तुति रहने केसीले बताए ।

गायकद्वय सत्य–स्वरूपले लामो समयको अन्तरालपछि आफूहरू सांगीतिक प्रस्तुतिका निम्ति अस्ट्रेलिया आउन लागेको बताए । “अस्ट्रेलियामा रहनुहुने नेपाली गीत–संगीतप्रेमीहरूमाझ प्रस्तुत हुन हामी हतारिएका छौँ,” उनीहरूले भनेका छन्, “विश्वास छ, हामीले यहाँहरूको सांगीतिक प्यास मेटाउन भरपुर प्रयास गर्नेछौँ ।”