काठमाडौं । नेपाली कांग्रेसका नेता कृष्ण सिटौलाले शान्ति प्रक्रियाका पक्षहरूबीच विश्वासको गम्भीर संकट रहेको बताएका छन् । मंगलबार त्रिभुवन विश्वविद्यालय द्वन्द्व, शान्ति र विकास अध्ययन विभागले गरेको शान्ति प्रक्रिया विगत र वर्तमान शीर्षकमा गरेको अन्तर्क्रियामा नेता सिटौलाले शान्ति प्रक्रियालाई पूर्णता दिन विश्वासको संकट चुनौतीका रुपमा रहेको बताए ।

“त्यसबेला सातदलको तर्फबाट गिरिजाबाबुले र माओवादीका तर्फबाट प्रचण्डजीले हस्ताक्षर गर्नुभएको थियो । त्यसबेला यी दुई शक्तिबीचमा उच्च तहको विश्वास थियो,” सिटौलाले भने, “अहिले सात दलको हिस्सा कांग्रेस र एमालेसँग छ । टुटफूट भएर छरिए पनि माओवादीको हिस्सा नेकपा माओवादी केन्द्रसँग छ ।” 

उनले यी पक्षबीचमा हिजोका दिनमा जस्तो विश्वास भने कायम नरहेको बताए । “यी दुई पक्षमा परस्परको विश्वास हुनुपर्नेमा विश्वासको संकट छ । एक अर्कालाई प्रयोग गर्ने र मौका मिले ठोक्ने खालको सोच कायम छ,” सिटौलाले भने, “यो सोच र मनोविज्ञान रहँदासम्म शान्ति प्रक्रियाको पूर्णताका लागि संक्रमणकालीन न्याय व्यवस्थापन सहज छैन ।”

उनले औपचारिक छलफलबाट विश्वास आर्जन नहुने र विश्वास कायम नहुँदा अनिश्चितता लम्बिने भन्दै विश्वासका लागि काम गर्नुपर्ने बताए । “औपचारिक छलफल अन्तर्क्रियाले त्यो विश्वास आर्जन हुँदैन,” सिटौलाले भने, “त्यसका लागि के गर्नुपर्ने हो । जिम्मेवारीमा हुनेहरूले त्यो जिम्मेवारी निर्वाह गर्नुपर्छ ।” 

सिटौलाले शान्ति सम्झौताका बाँकी काम पूरा गर्न माअ‍ोवादीलाई विश्वासमा लिन अनिवार्य भएको भन्दै अप्रत्यक्ष रूपमा सर्वदलीय सरकारको सुझाव दिएका छन् ।