काठमाडौं । राष्ट्रिय स्वतन्त्र पार्टी (रास्वपा)ले सहकारीमा ठगिएको ८७ अर्ब रुपैयाँ मकै पोल्ने र जुत्ता सिलाउनेको नभएको धारणा सार्वजनिक गरेको छ ।

दोस्रो चरणको आन्दोलनका कार्यक्रम सार्वजनिक गर्न आइतबार आयोजित पत्रकार सम्मेलनमा रास्वपाका कार्यवाहक प्रवक्ता मनिष झाले सहकारीमा ठगिएको ८७ अर्बमा केही रकम मात्र मकै पोल्ने र जुत्ता पालिस गर्नेको भएको बताए । उनले उक्त अरू रकम राजनीतिक भ्रष्टाचारीको भएको जिकिर गरे ।

“सहकारीको ८७ अर्ब रुपैयाँ अपचलन भएको भन्ने छ । तपाईंहरूलाई लाग्छ कि त्यो सबै मकै पोल्ने र जुत्ता पालिस गर्नेको पैसा हो ? होइन नि,” झाले भने, “त्यो त राजनीतिक भ्रष्टाचारको पैसा हो ।”

उनले पुराना पार्टीले कालो धनको पैसा लुकाउन स्रोत खोल्नु नपर्ने हुनाले सहकारीमा लगेको बताए । एक करोड रुपैयाँभन्दा माथिको रकम भ्रष्टाचारीको भएको उनले दाबी गरे ।