काठमाडौं । राष्ट्रपति रामचन्द्र पौडेलले पूर्वसभामुख दमननाथ ढुंगानाको निधनमा दुःख व्यक्त गरेका छन् । ढुंगानापछि सभामुखको जिम्मेवारी समेत सम्हालेका राष्ट्रपति पौडेलले उनको मृत्युको खबरले आफू मर्माहत भएको उल्लेख गरेका छन् ।

“पूर्वसभामुख एवं संविधानविद् दमननाथ ढुंगानाको निधनको खबरले मलाई मर्माहत बनाएको छ,” राष्ट्रपति पौडेलले आइतबार सामाजिक सञ्जाल एक्समा लेखेका छन्, “पञ्चायतकालमा विद्यार्थी संगठनबाट राजनीति प्रारम्भ गर्नुभएको उहाँले वरिष्ठ अधिवक्ता, मानवअधिकारवादी र नागरिक समाजको अगुवाको पहिचान बनाउनुभएको छ ।”

नेपालको लोकतान्त्रिक आन्दोलनमा ढुंगानाले पुर्‍याएको योगदानलाई मुलुकले सधैँ स्मरण गरिरहने उनले उल्लेख गरेका छन् । “दुःखको यस घडीमा प्रिय मित्र ढुंगानाप्रति श्रद्धाञ्जली व्यक्त गर्दै शोकाकुल परिवारजनमा गहिरो समवेदना व्यक्त गर्दछु,” राष्ट्रपति पौडेलले लेखेका छन् ।

पूर्वसभामुख ढुंगानाको आइतबार निधन भएको हो । काठमाडौंको फ्रन्टलाइन अस्पतालमा उपचारका क्रममा उनको निधन भएको पारिवारिक स्रोतले जानकारी दिएको छ । 

प्रेस सल्लाहकार किरण पोखरेलका अनुसार नेपालको संवैधानिक र संसदीय इतिहासमा ढुंगानाको योगदान विशिष्ट खालको रहेको स्मरण राष्ट्रपतिले गरेका छन् । 

• पूर्वसभामुख दमननाथ ढुंगानाको निधन