कोरला (मुस्ताङ) । काठमाडौं कलंकीका रिकेश खड्का बुरुक्क उफ्रिएर २४ नं. पिलरमाथि उक्लनासाथ तिर..तिर... सिटी बज्यो । सुरक्षाकर्मीले उनलाई पिलरमाथि नबस्न निर्देशन दिए । पिलरमाथि उभिएर तस्बिर खिच्न खोजेका रिकेश ओर्लिएर नछोई एक दुई ‘स्न्याप’ तस्बिर खिचे । केही बेरपछि नै रिकेशजस्तै अर्का नेपाली युवकलाई पनि सुरक्षाकर्मीले रोके । 

रिकेशले बाह्रखरीसँग भने, “यो त चलचित्र लुटको गीतजस्तो रहेछ, छुनलाई होइन हेर्नचाहिँ पाइन्छ ।” उनले नेपाल–चीन सीमामा कडा सुरक्षा प्रबन्ध आफूले देखेको सुनाए । 

२४ नं. पिलर नेपाल–चीन सीमाको कोरला नाकामा अवस्थित छ । यही पिलरले दुई देशको सिमाना छुट्ट्याएको छ । 

यो वर्षको हिउँद सुरु हुनै लाग्दा धेरै आन्तरिक पर्यटक कोरला नाका घुम्न पुगिरहेका छन् । 

मुस्ताङका धेरैजसो पर्यटकीय स्थलहरूमा आन्तरिक पर्यटकको घुइँचो छ । समय र उत्साह हुनेहरू मुक्तिनाथ मास्तिर उपल्लो मुस्ताङको यात्रामा निस्किरहेका छन् । लोमन्थाङबाट २१ किलोमिटर यात्रा गरी कोरला पुग्न सकिन्छ । चिसो बढेपछि हिमपात हुने भएकले मंसिर १५ सम्म पर्यटकको चहलपहल हुने लोमन्थाङकी टासी शेर्पाले बताइन् ।

नेपाली सीमामा सशस्त्र प्रहरी बलले सुरक्षाको प्रबन्ध गरेको छ । चीनतर्फको भू–भागमा ठूला सीसी क्यामेराले वारि नेपालतर्फ सिमानाको निगरानी गरिन्छ । पारि चीनतर्फको तस्बिरहरू खिच्न रोक लगाइएको छ । 

भन्सार नाका कटेर चीन प्रवेश गर्न पाइँदैन । नेपालतर्फ चिनियाँ सामान बेच्न बसेका पसलेहरू छन् । चिनियाँ जुत्ता, चकलेट, ज्याकेट, चाउचाउ आदि नेपालतर्फ खरिद गर्न पाइन्छ । त्यहाँका व्यापारीका अनुसार, सीमा घुम्न पुग्ने नेपाली उनीहरूका ग्राहक हुन् ।