मलेखु (धादिङ) । गणेश हिमाल बेसक्याम्प नजिकै हाई अल्टिच्युडका कारण बिरामी परेर फसेकाहरूलाई उद्धार गर्न गएको नेपाली सेनाको हेलिकप्टर ल्यान्ड गर्न नसकेपछि फर्किएको छ । खराब मौसमका कारण ल्यान्ड गर्न नसकेपछि आँखुखोलाको शिर आसपासमा फसेकाहरूलाई उद्धार नगरेरै हेलिकप्टर फर्किएको हो ।

पटकपटक ल्यान्ड गर्ने प्रयास गरे पनि खराब मौसम र सञ्चार सम्पर्क गर्न नसकेपछि फर्किएको धादिङका सहायक प्रमुख जिल्ला अधिकारी युवराज अर्यालले जानकारी दिए ।

ट्रेकिङ टोलीमा रहेका रुबिभ्याली गाउँपालिकाका विपीन तामाङका अनुसार, गणेश हिमाल बेसक्याम्पको केही तल (करिब डेढ घण्टाको दुरीमा) ट्रेकिङ गएका १६ जना फसेका छन् ।

डिभिजन वन कार्यालय धादिङका प्रमुख विष्णुप्रसाद आचार्य र रेन्जर अनुसुया ढुंगाना बिरामी परेका छन् । ट्रेकिङमा रहेका ११ जना भने रुबिभ्याली गाउँपालिका–४ हिन्दुङ नजिकै आइपुगेका छन् ।

पर्यापर्यटन प्रवर्धनको उद्देश्यले धादिङको रुबिभ्याली गाउँपालिका र डिभिजन वन कार्यालय धादिङको टोली ६ दिनदेखि यात्रामा छन् । सोमबार राति त्यस स्थानमा पुगेका उनीहरू हाई अल्टिच्युडका कारण बिरामी परेका थिए ।

त्यस स्थान नजिक मानवबस्ती नभएको र सञ्चार सम्पर्क नभएपछि आज बिहानदेखि ६ घण्टा हिँडेर सञ्चार सम्पर्कमा आएको ट्रेकिङमा रहेका पत्रकार मिलन तिमिल्सिनाले बताए ।

“फसेको ठाउँ बेसक्याम्प पुग्न करिब डेढ घण्टा जति समयको दुरीमा छ । त्यहाँ फोन लाग्दैन । सोमबार राति त्यहाँ पुगेको हो । अहिले पनि त्यही छ । हामी टेलिफोन लाग्ने ठाउँसम्म आएर सम्पर्कमा आएका हौँ,” तिमल्सिनाले भने ।

ट्रेकिङ टोलीमा २७ जना रहेको र दुई जना बिरामी परेपछि बिरामीसहित १६ जनालाई त्यही छोडेर ११ जना अहिले १४ घण्टा हिँडेर तिप्लिङको हिन्दुङ नजिक आइपुगेको उनले जानकारी दिए । रासस