काठमाडौं । प्रधानन्यायाधीश प्रकाशमानसिंह राउतले देशले परिणाम खोजेको भन्दै त्यसको जिम्मा लिने व्यक्तिहरू तयार रहनुपर्ने बताएका छन् । बुधबार कान्तिपुर कन्क्लेभमा प्रधानन्यायाधीश राउतले न्यायपालिकाको जिम्मा आफूले लिने भन्दै चौथो अंग र कार्यपालिका व्यवस्थापिकाको जिम्मा कसले लिने भन्दै प्रश्न उठाए ।

प्रधानन्यायाधीश राउतले भने, “न्यायपालिकाको जिम्मा म लिन्छु, राज्यको चौथो अंगको जिम्मा कसले लिन्छ ? अरु क्षेत्रको जिम्मा कसले लिन्छ ? अरुले जिम्मा लिन्छ लिँदैन थाहा छैन, मेरो ठाउँको जिम्मा म लिन्छु ।”  

प्रधानन्यायाधीश राउतले मुलुकले बौद्धिक छलफल मात्र नखोजेको भन्दै परिणाम दिने काम गर्न आवश्यक रहेको बताए । परिणाम दिन नसके निराशा र वितृष्णामाथि विजय प्राप्त नहुने उनको भनाइ थियो ।

“मुलुकले खोजेको के हो, मुलुकले बौद्धिक छलफल होइन परिणाम खोजेको छ । तपाईंले परिणाम दिनुहुन्छ विश्वास जन्मिन्छ । त्यो विश्वास हाम्रा सुकर्महरूबाट आउँछ, सत्प्रयासबाट आउँछ,” राउतले भने, “परिणाममुखी हुनुपर्छ । हैन भने निराशा र वितृष्णामाथि हामीले विजय पाउन सक्दैनौँ ।” 

त्यहीकारण अध्ययन प्रतिवेदन बनाएर थन्क्याउने अभ्यास छोडेर परिणामका लागि एक्सनमा जानु आवश्यक रहेको उनले बताए । “हामीले बौद्धिक छलफल होइन एक्सन ओरियन्टेड काम मात्र गर्नुपर्छ, यो दराजमा प्रतिवेदन थन्क्याउने कामले हुँदैन,” राउतले भने ।

उनले समाजले सहीलाई सही र गलतलाई गलत भन्ने ल्याकत गुमाउँदै गएको र त्यो सकिन्छ वा सकिँदैन भन्दै प्रश्न गरे । सहीलाई सही र गलतलाई गलत भन्न मान्छेमा निष्ठाको आवश्यकता हुने उनको भनाइ थियो ।

“हामीले राइटलाई राइट र रंङलाई रङ भन्न पनि सकेका छैनौँ । त्यो सकिँदैन वा कहिलेबाट सकिन्छ ?,” प्रश्न गर्दै राउतले भने, “मेरो विचारमा प्रचुर मात्रामा निष्ठा भएन भने रङलाई रङ राइटलाई राइट भन्ने सामर्थ्य कसैले राख्दैन । आज मान्छेले गलतलाई गलत भन्ने सामर्थ्य पनि गुमाए जस्तो लाग्दैछ ।”

उनले यो अवस्थाले देशले दुर्घटनाको बाटो तय गर्ने चेतावनी दिए । त्यसबाट फकाउने एउटै माध्यम सत्यको मात्र वकालत रहेको उनको सुझाव थियो ।

“यदि गलतलाई गलत भन्ने सामर्थ्य गुम्न थाल्यो भने दुर्भाग्यको श्रृंखला कहिले पनि रोकिँदैन ।  त्यसले जहिले पनि निरन्तरता पाइरहन्छ,” राउतले भने, “आफ्नो समय र कालखण्डमा यो भन्न सक्नुपर्दछ । अब हामीले ढिला नगरी सत्यको मात्र वकालत गर्नुपर्ने समय आइसक्यो ।”