काठमाडौं । फिफा विश्वकप–२०२६ छनोटअन्तर्गत घरेलु मैदानमा हुने अर्जेन्टिनाविरुद्धको खेलमा पराग्वेले मैदानमा पाहुना टिमको जर्सी लगाएर प्रवेश गर्न प्रतिबन्ध गरेको छ । 

सन् २०२२ को कतार विश्वकप विजेता अर्जेन्टिनाले नोभेम्बर १५ मा पराग्वेविरुद्ध उसैको मैदानमा प्रतिस्पर्धा गर्दैछ । तर, खेलअघि पराग्वे फुटबल संघ (पीएफए)का लाइसेन्स म्यानेजर फर्नान्डो भिलासबोएले खेलमा अर्जेन्टिनाको जर्सी लगाए मैदानमा प्रवेश गर्न नपाइने जनाएका हुन् ।

“हामीले स्थानीय समर्थकलाई घरेलु टिम वा तटस्थ टिमबाहेक विपक्षी टिमको जर्सी लगाए मैदानमा प्रवेश नपाइने चेतावनी दिइसकेका छौँ,” भिलासबोएलाई उद्धृत गर्दै चर्चित अन्तर्राष्ट्रिय न्युज पोर्टल गोलले खुलाएको छ । 

भिलासबोएका अनुसार अर्जेन्टिनाको जर्सी प्रतिबन्ध भए पनि विपक्षी खेलाडीको नाम रहेको क्लबको जर्सी लगाउन भने खुला छ । 

अर्जेन्टिना र पराग्वेबीचको खेल नोभेम्बर १५ मा नेपाली समयअुनसार बिहान ५ः१५ बजेदेखि सुरु हुने तालिका छ । 

दक्षिण अमेरिकाको छनोटमा अर्जेन्टिना शीर्ष स्थानमा छ । अर्जेन्टिनाले १० खेल खेल्दा २२ अंक जोडेको छ । अर्जेन्टिनालाई पछ्याइरहेको कोलम्बियाले १० खेलबाट १९ अंक जोडेको छ । तालिकाको छैटौँ स्थानमा रहेको पराग्वेले भने १० खेलबाट १३ अंक जोडेको छ ।