काठमाडौं । सामसङले नेपालमा ग्यालेक्सी ए१६ फाइभजी स्मार्टफोन सार्वजनिक गरेको छ । कम्पनीले किफायती मिडरेन्ज स्मार्टफोन भनेको ए१६ फाइभजीमा ६ वर्षको सफ्टवेयर सपोर्ट, सिक्नेचर ‘कि आइल्यान्ड’सहितको प्रिमियम डिजाइन, आईपी५४ रेटिङ, मिडियाटेक प्रोसेसर र ट्रिपल क्यामेरा सिस्टम रहेको जनाइएको छ ।

यही नोभेम्बर ९ मा काठमाडौंमा गायक वाङ्देन शेर्पाको उपस्थितिमा ओटाकु जात्रामा ग्यालेक्सी ए१६ फाइभजी सार्वजनिक गरिएको कम्पनीले जानकारी गराएको छ ।

नयाँ फोनबारे सामसङ नेपालका निर्देशक प्रणयरत्न स्थापितले आफ्नो सेग्मेन्टमा ६ पुस्ताको ओएस अपग्रेड र ६ वर्षको सुरक्षा अपडेट उपलब्ध गराएर ग्यालेक्सी ए१६ फाइभजीले भ्याल्यु प्रपोजिसनलाई पुनः परिभाषित गर्दै प्रयोगकर्तालाई लामो समयसम्म नवीनतम सुविधा दिने बताए ।

मोटाइ ७.९ मिलिमिटर रहेको यो फोन ग्यालेक्सी ए सिरिजको सबैभन्दा पातलो मिड–रेन्ज उपकरण भएको कम्पनीको भनाइ छ ।

फोनमा प्रिमियम फिनिस र विशिष्ट कि आइल्यान्ड फ्रेमसहित ग्लासस्टिक ब्याक प्यानलको सुविधा छ । किनारमा रहेका बटन प्रयोग गर्न सजिलो होस् भनेर हल्का रूपमा उठाइएको फ्रेममा राखिएको कम्पनीले जनाएको छ ।

यस्तो छ फिचर
ग्यालेक्सी ए१६ फाइभजीमा ५० मेगापिक्सेलको मुख्य क्यामेरा, ५ मेगापिक्सेलको अल्ट्रा–वाइड क्यामेरा र २ मेगाक्सिेलको म्याक्रो क्यामेरा छ । सेल्फी क्यामेरा १३ मेगापिक्सेलको छ ।

६.७ इन्च फुल एचडीप्लस सुपर एमोलेड डिस्प्ले रहेको फोनमा ९० हर्जको रिफ्रेस रेट र मेमोरी एक टेराबाइटसम्म थप्न सकिने सुविधा छ । मिडियाटेक डी६३०० चिपले गेमिङ, स्ट्रिमिङ र सामग्री सेयर गर्न उत्कृष्ट पफर्मेन्स प्रदान गर्ने कम्पनीले जनाएको छ ।

५ हजार एमएएचको ब्याट्रीसँगै ग्यालेक्सी ए१६ फाइभजीमा सामसङ नक्स भल्टको सुरक्षा सुविधा छ ।

कालो, हल्का हरियो र सुनौला रङमा उपलब्ध फोनको ६ जीबी र्‍याम र १२८ जीबी स्टोरेज भएको भेरियन्टको प्रतिमूल्य २८ हजार ९९९ रुपैयाँ कायम छ ।

यस्तै, ८ जीबी र्‍याम र १२८ जीबी स्टोरेज रहेका भेरियन्टको मूल्य ३० हजार ९९९ रुपैयाँ राखिएको छ । ८ जीबी र्‍याम र २५६ जीबी स्टोरेज भएको भेरियन्टको मूल्य ३४ हजार ९९९ रुपैयाँ कायम छ ।

आउँदो मंगलबारदेखि बजारमा उपलब्ध हुने फोनको खरिदमा २५ वाटको एड्याप्टर निःशुल्क पाइन्छ । शून्य प्रतिशत ब्याजदरमा इन्स्टा फाइनान्समार्फत पनि फोन किन्न सकिने सामसङले जनाएको छ ।