काठमाडौं । खानेपानीमन्त्री प्रदीप यादवले सरकारले सहकारी ठगहरूबाट असुलउपर गरेर पीडितको रकम फिर्ता गराउने बताएका छन् । शनिबार (हिजों काठमाडौंमा राष्ट्रिय फोटोपत्रकार समूह, नेपालको २७औँ वार्षिक साधारणसभामा उनले यस्तो प्रतिबद्धता जनाएका हुन् ।

उनले वर्तमान सरकारले राम्रो काम गरिरहेको उल्लेख गरे । देशमा सहकारीपीडित नागरिक धेरै भएको भन्दै मन्त्री यादवले उनीहरूको पैसा फिर्ता गराउनका निम्ति सरकारको कदम अघि बढेको बताए ।

उनले ६०० भन्दा बढी सहकारी ठगलाई सरकारले प्रहरी ‘कस्टडी’मा ल्याएको सुनाए । गल्ती गर्नेहरू ठूला राजनीतिक दल नै भए पनि सरकारले नछोड्ने उनले बताए ।

“...सहकारीपीडित नागरिकको पैसा फिर्ता गराउनको निमित्त सरकारको कदम अघि बढेको छ,” उनले भने, “त्यसको निमित्त अहिले ६०० जनाभन्दा बढी सहकारी ठगलाई प्रहरी कस्टडीमा सरकारले ल्याएको छ ।”

जुलुस, आन्दोलन गरेर सहकारीपीडितले न्याय नपाऊन् भन्ने हेतुबाट काम भइरहेको उनले राष्ट्रिय स्वतन्त्र पार्टी (रास्वपा)लक्षित टिप्पणी गरे । उनले वर्तमान सरकारले गल्ती गर्नेलाई छुट नदिने जिकिर गरे ।

“यहाँ जुलुस, आन्दोलन गरेर सहकारीपीडितले न्याय नपाऊन् भन्ने हेतुबाट काम भइरहेका छन्, तर सरकार डराउँदैन । सरकारले काम अघि बढाइसकेको छ,” उनले भने ।

ढोरपाटन नगरपालिकाका मेयर नेकपा (एमाले)बाट रहेको र सोही पार्टीका अध्यक्ष केपी शर्मा ओली प्रधानमन्त्री भए पनि सहकारीको रकम अपचलन आरोपमा उनलाई अनुसन्धानमा ल्याइएको मन्त्री यादवले बताए ।

आन्दोलन गरेर समस्या बल्झाउन खोजिएको भन्दै उनले विरोध गर्नेहरू सफल नहुने उल्लेख गरे । उनले सरकारले भनेको काम पूरा गरिरहेको बताए । न्युज एजेन्सी नेपाल