काठमाडौं । पेप ग्वार्डिओला मुख्य प्रशिक्षकमा नियुक्त भएयता म्यानचेस्टर सिटीले पहिलोपटक लगातार चार खेलमा हार बेहोरेको छ ।

सिटीले सन् २००६ पछि लगातार चार खेलमा हार बेहोरेको हो । प्रिमियर लिगअन्तर्गत शनिबार राति ब्राइटनसँग २–१ ले पराजित भएसँगै सिटीले यो खराब कीर्तिमान बनाएको हो ।

ब्राइटनविरुद्ध पहिलो हाफमा १–० को अग्रता बनाए पनि सिटीले यसलाई कायम राख्न सकेन । खेलको २३औँ मिनेटमा एर्लिङ हाल्यान्डको गोलमा सिटीले अग्रता बनाएको थियो । जारी सिजन प्रिमियर लिगमा हाल्यान्डको यो १२औँ गोल हो ।

तर, ७८औँ मिनेटमा जाओ पेड्रोले गोल गर्दै सिटीलाई खेलमा फर्काए । त्यसको पाँच मिनेटपछि म्याट ओरिलेले गोल गर्दै ब्राइटनलाई सनसनीपूर्ण जित दिलाएका हुन् ।

जितसँगै ११ खेलबाट १९ अंक जोडेको ब्राइटन तालिकाको चौथो स्थानमा उक्लिएको छ । समान खेलबाट २३ अंक जोडेको सिटी भने तालिकाको दास्रो स्थानमा छ । यो हारसँगै सिटी शीर्ष स्थानको लिभरपुलभन्दा पाँच अंकले पछि परेको छ लिभरपुलले ११ खेलबाट २८ अंक जोडेको छ ।