काठमाडौं । ठङ्गरम इन्टरनेसनल एकेडेमी (टीआईए)को आयोजनामा टीआईए कप अन्तरविद्यालय बास्केटबल प्रतियोगिता आगामी सोमबारदेखि सुरु हुने भएको छ । प्रतियोगितामा सिनियर ब्वाइज, गर्ल्स र स्टाफ गरी तीन विधा समावेश गरिएको छ । 

सियिनर ब्वाइज र गर्ल्स फुल कोर्ट तथा स्टाफतर्फ भने थ्री बाई थ्रीमा प्रतिस्पर्धा हुने छ । 

बूढानीलकण्ठ नगरपालिका–७ हात्तीगौँडास्थित टीआईएकै कोर्टमा हुने प्रतियोगितामा सियनर ब्वाइज र गर्ल्समा समान १६ तथा स्टाफमा १२ टोलीको सहभागिता रहने आयोजकले जनाएको छ ।

प्रतियोगितामा सहभागी टोलीलाई चार समूहमा विभाजन गरिएको छ । प्रतियोगितामा सहभागिताका लागि टिम दर्ता शुल्क चार हजार ५०० रुपैयाँ तोकिएको थियो ।

प्रतियोगितामा शीर्ष तीन स्थान हासिल गर्नेले ट्रफी, मेडल र प्रमाणपत्र प्राप्त गर्ने छन् । प्रतियोगिताको अनुमानित बजेट चार लाख ५० हजार रहको आयोजकको अनुमान छ । 

टीआईएका प्रधानाध्यापक उत्ताराज थापाले विद्यालयबीचको आपसी सम्बन्ध मजबुद होस् र खेलाडीको क्षमतामा वृद्धि होसन् भन्ने उदेश्यले प्रतियोगिता आयोजना गरिन लागेको बताए ।

“हाम्रो मुख्य उद्देश्य भनेको विद्यालयबीचको सम्बन्ध मजबुद बनाउने र खेलाडीको क्षमतालाई बाहिर ल्याउने हो । टीआईएकै उत्पादन अहिले राष्ट्रिय टोलीबाट खेलिरहेका छन्,” थापाले भने, “यो प्रतियोगिताले पनि नेपाली बास्केटबलको विकासमा थोरै भए पनि सहयोग पुर्‍याउँछ भन्ने विश्वास छ ।”