काठमाडौं । ०७६ असोज २९ गते साँझ करिब साढे ७ बजे । अर्घाखाँचीको छत्रदेव गाउँपालिका–३ की ११ वर्षीया कविता कार्की (नाम परिवर्तन) घरनजिकैको पसलमा लाइटर किन्न निस्किइन् ।

बाहिर मानिसको खासै चहलपहल थिएन । सुनसान भइसकेको थियो । तर, परिवारको आग्रहमा उनी लाइटर किन्न पसलतिर हिँडिन् । सधैँ जाने–आउने पसल भएकाले उनले अप्ठ्यारो मानिनन् ।

उनी दौडिँदै लाइटर किन्न पसल पुगिन् । र, लाइटर किनेर सरासर घर फर्कंदै थिइन् । त्यही बेला उनले कल्पना समेत नगरेको दुर्घटना भोग्न बाध्य भइन् । छिमेकी १७ वर्षीय कमल विक (नाम परिवर्तन)ले उनको बलात्कार गरे ।

लाइटर किन्न पसल पठाएकी छोरी बीचबाटोमा बलात्कृत भएको थाहा पाएपछि पीडित परिवार प्रहरीकहाँ पुग्यो । प्रहरीले बलात्कार आरोपमा बालक १७ वर्षीय कमल विकलाई पक्राउ गर्‍यो ।

प्रहरीको प्रारम्भिक अनुसन्धानपछि अर्घाखाँची जिल्ला अदालतले उनलाई पुर्पक्षका निम्ति थुनामा पठायो । तर, पाँच महिना १८ दिन बाल सुधारगृहमा बसेपछि उच्च अदालत तुलसीपुरको बुटवल इजलासले विकलाई थुनामुक्त गर्ने आदेश गर्‍यो । उनी थुनामुक्त भए ।

तर, अर्घाखाँची जिल्ला अदालतले अन्तिम फैसला गर्दै विकलाई १२ वर्ष कैद सजाय निर्धारण गर्‍यो । घटनाको समयमा १७ वर्षीय नाबालिग रहेका विक हाल २२ वर्षीय युवक भइसकेका छन् ।

उनी थुनामुक्त भएसँगै फरार थिए । गएको मंगलबार अर्घाखाँचीबाट खटिएको प्रहरी टोलीले उनलाई पक्राउ गरेको छ । ०७७ फागुन २ गते अर्घाखाँची जिल्ला अदालतले उनलाई १२ वर्ष कैद सजाय तोकेको थियो ।

विक यसअघि पाँच महिना १८ दिन थुनामा बसिसकेका छन् । अब उनले थप ११ वर्ष ६ महिना जेल सजाय भोग्नुपर्ने भएको छ ।

जिल्ला अदालको फैसलालगत्तै फरार रहेका विकलाई विशेष सूचनाको आधारमा छत्रदेव गाउँपालिका–४, गौरीपिपलबाट पक्राउ गरिएको अर्घाखाँची प्रहरीले जनाएको छ ।

विकलाई बुधबार अदालतमा हाजिर गराइएको जिल्ला प्रहरी कार्यालय अर्घाखाँचीका प्रमुख एवं प्रहरी नायब उपरीक्षक (डीएसपी) चक्रबहादुर मल्लले जानकारी दिए ।

घटनाका बेला उनी नाबालिग नै भएका कारण थुनाका निम्ति बाल सुधारगृह भैरहवामा पठाइएको छ । पीडित र पीडक दुवै नाबालिग भएकाले प्रहरीले उनीहरूको पहिचान गोप्य राखेको हो ।