काठमाडौं । अमेरिकी राष्ट्रपति चुनावकी उमेदवार कमला ह्यारिसले आफ्नो चुनावी प्रचारको अन्तिम सभा गरेकी छिन् । वाशिङ्टन डिसिमा आयोजित सभामा कमला ह्यारिसले आफ्ना प्रतिद्वन्द्वी डोनाल्ड ट्रम्प सानो तानाशाह भएको टिप्पणी गरेकी छन् ।

सन् २०२१ को जनवरी ६ मा डोनाल्ड ट्रम्पले आफ्ना समर्थकलाई अमेरिकी कंग्रेस (संसद भवन)मा आक्रमण गर्नु उक्साएको ठाउँमा ह्यारिसले आफ्नो चुनावी प्रचारको अन्तिम सभा गरिन् । ट्रम्पले आफ्ना समर्थकलाई अमेरिकी कंग्रेसमा आक्रमण गर्न उक्साएको दिन सम्झिदै ह्यारिसले भनिन्, “अमेरिकी इतिहासमा सम्भवत पहिलोपटक यो चुनाव स्वतन्त्रता र अराजकताबीचको छनोट हो ।” 

सन् २०२१ मा ट्रम्पले जनताको इच्छा उल्ट्याउने मनसायले अमेरिकी कंग्रेसमा हमला गरेको स्मरण गर्दै उनले भनिन्, “ट्रम्पसँग शत्रुहरूको सूची छ । चुनाव जितेमा ट्रम्पले ती सबैसँग बदला लिनेछन् ।” 

ह्यारिसले आफू बदला नभई अमेरिकी नागरिकका लागि गर्नुपर्ने कामको सूची लिएर कार्यालय (ह्वाईट हाउस) जाने बताइन् । उनले भनिन्, ‘ट्रम्प आफूले बदला लिनुपर्ने शत्रुहरूको सूची लिएर अफिस जानेछन् । म अमेरिकी नागरिकका लागि गर्नुपर्ने कामहरूको सूची लिएर अफिस जानेछु ।”

ट्रम्पले अमेरिकी नागरिकबीच विभाजन ल्याएर अमेरिकामा अराजकता फैलाउन चाहेको ह्यारिसको आरोप छ । 

“डोनाल्ड ट्रम्पले अमेरिकी जनतालाई एक अर्कासँग डराउँदै विभाजित गराउँदै एक दशक बिताए । तर, अमेरिकालाई म भन्छु, हामी त्यसता होइनौँ,” उनले अगाडि भनिन्, “हामी (अमेरिकन)लाई नै हामीभित्रका दुश्मन भनेर डोनाल्ड ट्रम्प अमेरिकी सैनिक, अमेरिकन नगारिकविरुद्ध प्रयोग गर्न चाहन्छन् । विभाजन र बदला खोजिरहेका डोनाल्ड ट्रम्प राम्रा उमेदवार होइनन् ।”

डोनाल्ड ट्रम्प अहिले सानो तानाशाहका रूपमा रहको र चुनाव जितेपछि उनी ठूलो तानाशाह बन्ने उद्देश्यमा रहेको उनको आरोप छ । 

यसअगाडि डोनाल्ड ट्रम्पले न्यूयोर्कको चुनावीसभाबाट ह्यारिसमाथि व्यक्तिगत तहमा ओर्लिएर आरोप लगाएका थिए । ट्रम्प र उनका समर्थकले ह्यारिस ‘लो आईक्यू भएकी महिला’ र उनी ‘वेश्वयावृति’बाट राजनीतिमा आएको आरोप लगाएका थिए ।एपी