काठमाडौं । आधुनिक सिंगापुरका संस्थापक नेता लि कुआन युका छोराले बेलायतमा शरण पाएका छन् । लि कुआनका छोरा लि सीएन याङले राजनीतिक रूपमा आफ्नो परिवार सिंगापुरमा सुरक्षित नभएको बताउँदै आएका छन् । उनले आफ्ना दाइ लि सीएन लुङसँग सम्पत्ति विवाद सामना गरिरहेका थिए । लि सीएन याङ अहिले बेलायतको राजधानी लन्डनमा बसिरहेका छन् ।

सन् २०१५ मा लि कुआनको मृत्यु भएपछि उनका जेठा छोरा लि सीएन लुङ र लि सीएन याङबीच सम्पत्ति विवाद चर्किएको थियो । उनीहरूको सम्पत्ति विवादको विषय सन् २०१७ मा सार्वजनिक भएको थियो ।

लि कुआनका जेठा छोरा लि सीएन लुङ सिंगापुरका पूर्वप्रधानमन्त्री पनि हुन् । उनी अहिले सिंगापुरको मन्त्रिपरिषद्मा वरिष्ठ मन्त्रीका रूपमा छन् । याङले आफ्ना दाइ तथा पूर्वप्रधानमन्त्री लुङले सत्ताको दुरुपयोग गर्दै आफ्नो परिवारलाई दुःख दिएको आरोप लगाउँदै आएका छन् । तर, सिंगापुर सरकारले भने उनको दाबी सत्य नभएको बताउँदै आएको छ । त्यसैगरी बेलायतमा शरण पाएका याङमाथि पनि सिंगापुरमा विभिन्न विषयमा अनुसन्धान चलिरहेको समाचार समेत बाहिरिएका छन् ।

यद्यपि, लि सीएन याङले बेलायतमा राजनीतिक शरण पाएको समाचार बाहिरिएपछि सिंगापुर सरकारले एउटा प्रेस विज्ञप्ति जारी गरेर याङ परिवार सिंगापुर आउन स्वतन्त्र रहेको बताएको छ । ली सीएन याङले आफूमाथि राजनीतिक प्रतिशोध साँधिने डरले बेलायतमा शरण मागेको दाबी गरेका छन् ।

विवाद किन ?
सन् २०१५ मा लि कुआन युको निधन भयो । मृत्यु अगाडि लि कुआन युले आफ्नो ऐतिहासिक घर भत्काउनु भनेर इच्छापत्रमा लेखेका थिए । तर, प्रधानमन्त्री रहेका ली सीएन लुङले आफ्ना बुबाको इच्छाविपरीत उक्त घर भत्काउन मानेन् ।

त्यसपछि लि कुआन युका कान्छा छोरा लि सीएन याङ र छोरी लि वी लिङले जेठा दाइले बुबाको इच्छाविपरीत काम गरेको आरोप लगाए । त्यसपछि चर्किएको यही विवादका कारण लि सीएन याङले बेलायतमा शरण माग्नु परेको हो । सन् २०१७ यता यो विवादले सिंगापुरको राजनीतिक नेतृत्वलाई पनि असर गरेको थियो, किनकी लि सीएन लुङले आफ्नो राजनीतिक शक्तिको दुरुपयोग गरेको भन्ने आरोप लाग्यो । तर, लि सीएन लुङले यी आरोपहरू अस्वीकार गर्दै परिवारको असहमति सार्वजनिक गर्न नचाहेको बताएका छन्  ।

लि कुआनको विरासतलाई लि सीएन लुङले आफ्नो राजनीतिक सम्पत्ति बनाएको आरोप लगाउँछन् लि सीएन याङ । यस विषयमा लि सीएन लुङ भने टिप्पणी गर्न चाहँदैनन् । सन् २०१७ को जुनमा उनले विज्ञप्तिमार्फत आफ्ना भाइले निजी पारिवारिक मामिलाहरू सार्वजनिक गरेर बुबाको विरासतमा चोट पु¥याएको बताउँदै आफू निराश भएको बताएका थिए ।