काठमाडौं । छैटौँ ‘डिशहोम बाह्रखरी कथा प्रतियोगिता–२०८१’ मा स्वदेश र विदेशबाट समेतगरी ९३७ कथाकारले प्रतियोगितामा सहभागिता जनाएका छन् ।
विगतमा जस्तै यस वर्ष पनि नयाँ युवा कथाकारहरूसँगै वरिष्ठ, अग्रज तथा स्थापित कथाकारहरूका कथा बाह्रखरीलाई प्राप्त भएको छ । बाह्रखरी मिडियाले गएको भदौ ३१ गते विश्वभरिका नेपाली भाषामा लेख्ने कथाकारहरूबाट कथा आह्वान गरेको थियो ।
कात्तिक ५ गते मध्यरातसम्मको समयसिमा तोकिएको यस अवधिमा नेपाल सहित भारतको दार्जीलिङ, असम, मणिपुर तथा अमेरिका, बेलायत, क्यानडा, जापान, थाइल्याण्ड, साउदी अरबलगातका अन्य मुलुकमा रहेका नेपाली कथाकारहरूले कथा पठाएर सहभागिता जनाएका छन् ।
प्राप्त ९३७ कथाहरू मध्ये सर्तअनुरूपको मापदण्डभित्र रहेका कथाहरूलाई आन्तरिक निर्णायक समूहका संयोजक गोविन्द अधिकारीसहित चार जनाको टोलीले उत्कृष्ट ५० कथा चयन गर्नेछ ।
आन्तरिक समूहले छनोट गरेका कथाहरू मूल निर्णायक समूहलाई बुझाउने छ । मूल निर्णायक समूहले उक्त कथाहरूमध्येबाट उत्कृष्ट २५ कथाको चयन गरी प्रथम, द्वितीय र तृतीय कथासमेत छुट्याउने छ ।
पहिलो तीन सहित २५ उत्कृष्ट कथाहरूको संग्रह विगतमा झैँ पब्लिसिङ पार्टनर फाइन प्रिन्टले कथा संग्रह पुस्तकका रूपमा प्रकाशन गर्नेछ । यस वर्ष मूल निर्णायक समूहको संयोजकमा समालोचक साहित्यकार प्रा.डा. ज्ञानू पाण्डे तथा सदस्यहरूमा साहित्यकारहरू डा. गीता त्रिपाठी र धीरेन्द्र प्रेमर्षि रहेका छन् ।
डिशहोम बाह्रखरी कथा लेखन प्रतियोगिता २०८१का आन्तरिक निर्णायक समूहका संयोजक गोविन्द अधिकारीले देश विदेशबाट प्रतियोगितामा सहभागिता जनाउने सम्पूर्ण कथाकारहरूप्रति आभार व्यक्त गरेका छन् ।
बाह्रखरीले आयोजना गर्दै आएको यस कथा प्रतियोगिताको टाइटल स्पन्सर डिशहोम डिश मिडिया नेटवर्क रहेकोे छ भने उत्कृष्ट कथा–२०८१ को प्रकाशन पार्टनर फाइन प्रिन्ट रहेको छ ।
प्रतियोगिताका अन्य सहयोगी संस्थाहरूमा नेपाल टेलिकम, नेपाल इन्भेष्टमेन्ट मेगा बैंक लिमिटेड, राष्ट्रिय वाणिज्य बैंक लिमिटेड, युनाइटेड अजोड इन्स्योरेन्स लिमिटेड, एनएमबी बैंक लिमिटेड तथा कृषि विकास बैंक लिमिटेड रहेका छन् । यस वर्ष एयरलाइन्स पार्टनर यती एयरलाइन्स तथा हिमालय एयरलाइन्स रहेका छन् ।
बाह्रखरी कथा प्रतियोगिताका आन्तरिक मूल्यांकन समितिका संयोजक अधिकारीले सम्पूर्ण सहभागी कथाकार सहित टाइटल स्पन्सर र सबै स्पन्सरहरूमा हार्दिक आभार व्यक्त गरेका छन् ।