काठमाडौं । नर्भिक अस्पतालमा पहिलोपटक ‘बड चियारी सिन्ड्रोम’को सफल उपचार गरिएको छ । अस्पतालका कलेजो रोग विशेषज्ञ डा. शेखर पौडेल नेतृत्वको टोलीले मोरङ पथरीका २७ वर्षीय सन्दीप तिम्सिनामा बड चियारी सिन्ड्रोमको सफल उपचार गरेको हो ।
 
तिम्सिनालाई एक वर्षअघि पोर्चुगलमा काम गरिरहेका बेला उक्त रोग पहिचान भएको थियो । यसअघि, भारतको नारायण अस्पताल पुगेका पौडेललाई तत्काल कलेजो प्रत्यारोपणको सल्लाह दिइएको थियो ।
 
नेपाल फर्केपछि नर्भिक अस्पताल परीक्षण गर्दा उनको कलेजो प्रत्यारोपणको साटो टिप्स/डिप्स (ट्रान्सजगुलर इन्ट्राहेपाटिक पोर्टाेसिस्टमेटिक शन्ट) मार्फत् सजिलै उपचार गर्न सकिने देखिएको थियो ।
 
उपचारपछि तिम्सिना शनिबार डिस्चार्ज भइसकेका छन् । नर्भिकले यसलाई नेपालकै पहिलो ‘बड चियारी सिन्ड्रोम’को सफल उपचारको भएको दाबी गरेको छ । यो उपचारले नेपालमै जटिल कलेजो रोगहरूको उपचार सम्भव भएको अस्पतालको भनाइ छ ।  

के हो बड चियारी सिन्ड्रोम ?
बड चियारी सिन्ड्रोम कलेजोमा रगत प्रवाह गर्ने नसाहरूमा अवरोध हुँदा कलेजो सुन्निने समस्या हो । यसले पेटमा पानी जम्ने (असाइटिस) र अन्य जटिल समस्या उत्पन्न गर्छ । धेरैजसो अवस्थामा समयमा उपचार नगरे कलेजो प्रत्यारोपण अन्तिम विकल्प हुन्छ ।
 
कसरी गरिन्छ उपचार ? 
टिप्स अथात् ट्रान्सजगुलर इन्ट्राहेपाटिक पोर्टाेसिस्टमेटिक शन्ट एक विशेष प्रक्रिया हो, जसले कलेजोको रगत प्रवाहलाई सामान्य बनाउन नसाका बीचमा सानो पाइप राखिन्छ ।

यसले रगत प्रवाह सहज बनाउँदै कलेजो सुन्निने र पेटमा पानी जम्ने समस्या हुन दिँदैन, जसका कारण कलेजो प्रत्यारोपण आवश्यक हुँदैन । त्यही विधीको प्रयोग गरी नर्भिकले बड चियारी सिन्ड्रोमको सफल उपचार गरेको हो ।