काठमाडौं । अमेरिकी न्याय विभागले एक भारतीय सरकारी कर्मचारीमाथि अमेरिकी नागरिकको हत्याको षड्यन्त्र गरेको आरोप लगाएको छ ।

अमेरिकाको न्युयोर्क सहरमा एक अमेरिकी नागरिकको हत्याको षडयन्त्रसँग ती भारतीय सरकारी अधिकारी जोडिएको विभागले जनाएको छ । 

क्यानडाले एक क्यानेडियन नागरिकको हत्यामा भारतीय सरकारी अधिकारी संलग्न रहेको आरोप लगाइरहेका बेला अमेरिकाको न्याय विभागले पनि यस्तो आरोप लगाएको हो । 

अमेरिकी न्याय विभागले ३९ वर्षीय भारतीय सरकारी कर्मचारी विकास यादवमाथि ‘भाडामा हत्याको षड्यन्त्र’ र ‘मनी लान्ड्रिङ’को आरोप लगाएको हो ।

अमेरिकी न्याय विभागले एक विज्ञप्तिमा विकास यादवलाई अमानतको नामले पनि चिनिने जनाएको छ ।

विकास यादवसँगको हत्या षड्यन्त्रमा संलग्न रहेको आरोप लागेका अर्का ५३ वर्षीय निखिल गुप्तालाई यसअघि नै अमेरिका सुपुर्दगी गरिएको विभागले जनाएको छ । अमेरिकाले विकास यादव फरार रहेको बताएको छ ।

“अमेरिकी न्याय विभागले यस मामिलामा संलग्न जो कोहीलाई पनि जवाफदेही बनाउन सक्दो प्रयास गर्नेछ । गत वर्ष हामीले भारतीय कर्मचारी विकास यादव र उनका सहयोगी निखिल गुप्ताले अमेरिकी नागरिकको हत्या गर्ने षड्यन्त्रलाई असफल पार्यौँ,” अमेरिकी महान्यायाधिवक्ता मेरिक बी गारल्याण्डले भनेका छन् । 

अमेरिकी संघीय अनुसन्धान एजेन्सी एफबीआईले भनेको छ, “भारतीय सरकारी कर्मचारीले आफ्नो साथीसँग मिलेर अमेरिकी नागरिकको हत्या गर्ने षड्यन्त्र रचेका थिए । कुनै पनि अमेरिकी नागरिकविरुद्ध हुने हिंसाको प्रयासलाई एफबीआईले कहिल्यै सहने छैन ।”