काठमाडौं । बिमा कम्पनीहरूमा केही दिनअघिको बाढीपहिरोका कारण क्षति भएको सम्पत्तिको तीन अर्ब ९८ करोड ७९ लाख रुपैयाँ दाबी परेको छ । बिमा गरिएका कृषि, गाडी तथा अन्य सम्पत्तिहरूमा क्षति पुगेको भन्दै दाबी परेको हो ।

तर, प्रारम्भिक निरीक्षण तथा प्राप्त सूचनाबमोजिम सात अर्ब ४० करोड ७१ लाख रुपैयाँभन्दा बढी दाबी पर्ने अनुमान गरिएको छ । यही असोज २२ गतेसम्म लघु बिमा कम्पनीसहित १८ बिमा कम्पनीमा दाबी परेको छ ।

यी बिमा कम्पनीहरूले ७८ लाख ६८ हजार रुपैयाँ दाबी भुक्तानी गरिसकेको नेपाल बिमा प्राधिकरणले जानकारी दिएको छ ।

प्रादेशिक हिसाबमा सबैभन्दा बढी दाबी वाग्मती प्रदेशमा परेको छ । यस प्रदेशमा तीन अर्ब ६३ करोड ६३ लाख ४७ हजार रुपैयाँ दाबी परेको छ । तर, यस प्रदेशमा ६ अर्ब ९६ करोड ८६ लाख ७२ हजार रुपैयाँ दाबी पर्ने प्रारम्भिक अनुमान गरिएको छ ।

जिल्लागत हेर्दा पनि सबैभन्दा बढी ललितपुरबाट एक अर्ब ३३ करोड ४७ लाख रुपैयाँ दाबी परेको छ । यस जिल्लाबाट कुल एक अर्ब ८३ करोड ३९ लाख रुपैयाँ दाबी पर्ने प्रक्षेपण गरिएको छ ।

तर, जिल्लागतरूपमा सबैभन्दा बढी दाबी काठमाडौंबाट पर्ने प्रक्षेपण गरिएको छ । यस जिल्लाबाट कुल दुई अर्ब ८९ करोड ८२ लाख रुपैयाँ दाबी पर्ने प्रक्षेपण गरिएको छ ।

प्रादेशिकरूपमा सबैभन्दा कम कर्णाली प्रदेशबाट दाबी पर्ने प्रक्षेपण गरिएको छ । यस जिल्लाबाट हालसम्म दुई लाख ५० हजारको दाबी परेको छ ।