रौतहट । जिल्ला प्रहरी कार्यालय रौतहट प्रमुखका घुमुवा हुँ भन्दै स्थानीय व्यापारीसँग पैसा उठाई हिँड्ने सुनीलकुमार बैठालाई प्रहरीले लागुऔषधसहितपक्राउ गरेको छ । 

प्रहरी उपरीक्षक (एसपी)का घुमुवा हुँ भन्दै  स्थानीय व्यापारीबाट पैसा असुल गरिरहेको भन्ने सूचनाका आधारमा रौतहटकै परोहा नगरपालिका–२, लालबकैयाका ३५ वर्षीय बैठालाई गए राति पक्राउ गरिएको प्रहरीले जनाएको छ ।

सादा पोसाकको घुमुवा प्रहरीका रूपमा रौतहटमा ठगीधन्धामा संलग्न बैठाका साथबाट २२ पोका गाँजा, नाइट्रोभेट ट्याब्लेट १० चक्की, कोकस डीएक्स एक  बोतल, मोबाइल एकथान, नगद १७ हजार ९०० रुपैयाँ र प्रदेश २–०३–०१९ प ९५३७ नम्बरको मोटरसाइकल बरामद गरिएको जिल्ला प्रहरी कार्यालयका प्रवक्ता एवं प्रहरी नायब उपरीक्षक दीपककुमार रायले बताए ।

आपराधिक गतिविधिमा संलग्न बैठालाई इलाका प्रहरी कार्यालय गरुडामा राखी थप अनुसन्धान भइरहेको प्रहरी जनाएको छ । रासस