काठमाडौं । यो वर्ष विजयादशमीको दिन शनिबार (भोलि) ठूलो वर्षाको सम्भावना छैन । बडादसैँको टीकाको दिन देशका धेरै स्थानमा मौसम सफाजस्तै रहने मौसम पूर्वानुमान महाशाखाले जनाएको छ ।

कोसी, वाग्मती र गण्डकी प्रदेशका केही पहाडी स्थानमा भने हल्कादेखि मध्यम वर्षाको सम्भावना रहेको महाशाखाका मौसमविद् गोविन्द झाले जानकारी दिए । तर, त्यो आत्तिनुपर्ने खालको नहुने उनले स्पष्ट पारे ।

“कोसी प्रदेशका थोरै र वाग्मती र गण्डकी प्रदेशका एक/दुई स्थानमा हल्कादेखि मध्यम वर्षाको सम्भावना छ,” उनले बाह्रखरीसित भने, “ठूलो वर्षाको सम्भावना छैन ।”

यीबाहेक अरू भूभागमा वर्षाको खासै सम्भावना नरहेको उनले बताए । यी प्रदेशका पनि पहाडी भूभागमा अलिअलि वर्षाको सम्भावना देखिएको उनले जानकारी दिए । विशेषतः मनसुनी वायुकै प्रभावले वर्षा हुन सक्ने उनले बताए ।

“अपराह्नको समयमा क्षणिक वर्षाको सम्भावना हो । त्यस्तो ठूलो होइन,” उनले भने, “भइहाले पनि धेरै ठाउँ र लामो समय हुँदैन । हल्का, छिटपुट हुने हो ।” 

उनका अनुसार, हाल देशमा पश्चिम वायुको प्रभाव बढ्दै गएको छ । मनसुनी वायुको प्रभाव कमजोर हुँदै गएको छ ।

कोसीसहित मधेस प्रदेशको अधिकांश र वाग्मतीको पूर्वी भू–भागमा मनसुनी वायुको प्रभाव छ । देशको बाँकी भू–भागमा पश्चिमी वायुको प्रभाव रहेको महाशाखाले जनाएको छ ।

शनिबार (भोलि) काठमाडौं उपत्यकामा पनि खासै वर्षाको सम्भावना नरहेको उनले बताए । “बदली अलिअलि छ । खासै वर्षाको सम्भावना छैन,” उनले भने ।