काठमाडौं । २०६० असोज १६ गते राति १२ बजेर १५ मिनेट । दसैँको रमझम थियो । २० वर्षअघि चाडबाडको रौनक अहिलेको भन्दा अझ छुट्टै र विशेष हुन्थ्यो । 

त्यसमा दसैँको रमझम कम हुने त कुरै थिएन । सरकारी बिदा नै करिब दुई हप्ता लामो हुन्थ्यो । त्यही रमझममा झुमेको थियो, ललितपुर बडिखेल खेलगाउँमा भानू नगरकोटीको परिवार ।

३६ वर्षीय भानूसहित उनकै श्रीमती ३० वर्षीया धन कुमारी नगरकोटी, १३ वर्षीय छोरा रवीन्द्र नगरकोटी, १० वर्षीय छोरी लुरी र वर्ष ८ की टुकुलीले अष्टमीको राति नेवारी परम्परा अनुसार कुची भोज खाए ।

कुची भोज खाएर राति रमाइलो गरी सुतेका भानूको पाँचजनाको परिवारले दसैँ मनाउन भने पाएनन् । उनीहरू पाँचजनाकै परिवारको राति सामूहिक हत्या भयो । भानूको परिवारकै हत्यापछि दसैँमा रमाउनुपर्ने खेलगाउँ नै शोकमा डुब्यो ।

उनीहरू पाँचजनाकै विभत्स तरिकाले सुतिराखेकै ठाउँमा हत्या गरिएको थियो । प्रहरीलाई अनुसन्धान गर्न नै कठिन थियो ।

१२ वर्षपछि हत्यारा पक्राउ
अष्टमीको राति पाँचजनाको हत्या भएको कहालिलाग्दो घटनाको अनुसन्धान गर्न प्रहरीले १२ वर्ष गुजार्यो । भानूको परिवारको हत्यामा संलग्न बडिखेलकै चन्द्रबहादुर पहारीलाई प्रहरीले भक्तपुर चाँगुनारायणबाट २०७२ भदौमा पक्राउ गरेको थियो । तत्कालीन अपराध महाशाखा हाल उपत्यका अपराध अनुसन्धान कार्यालयको टोलीले पहारीलाई पक्राउ गरेको थियो । ६० वर्षको उमेरमा पक्राउ परेका पहरी खेती गर्थे । र, राँगाभैसी काट्ने काम गर्थे । भानुको परिवारको हत्यापछि बडिखेल छाडेर भक्तपुर बसाईं सरेका थिए । नाताले चन्द्रबहादुरका ज्वाइँ पर्थे भानू ।

किन गरेका थिए सामूहिक हत्या ?
चन्द्रबहादुर र भानू जेठान र ज्वाइँ भए पनि पारिवारिक सम्बन्ध राम्रो थिएन । भानूको परिवारको हत्या हुनु एक साता अघिमात्रै चन्द्र बहादुरकी श्रीमती सूर्यकुमारी पहरी र भानुकी श्रीमती धनकुमारी नगरकोटीबीच समेत झगडा भएको थियो । सूर्यकुमारीका कारण आफ्नो श्रीमान भानू बिग्रिएको आरोप धनकुमारीको थियो ।

भानू र सूर्यकुमारी पहरीसँगै बसी मदिरा समेत पिउँथे । त्यो कुरा चन्द्रबहादुरलाई राम्रो लागेको थिएन । त्यही रिसले भानूको परिवार नै अष्टमीको दिन पारेर सामूहिक हत्या गरेका हुन् ।

हत्या गर्नुअघि चन्द्रबहादुर पहरीको आमाको घरमा रांगा काटी मासु भाग लगाए बाँडेका थिए । त्यही मासु भानूका परिवारले समेत लिएका थिए । त्यो राति चन्द्रबहादुरले मदिरा पिए ।

मदिराले लठ्ठिएका उनी घरमा कसैलाई पनि थाहा नदिइ भानूको घर छिरेका थिए । खाली खुुट्टा सर्ट र हाफ पाइन्ट लगाए चन्द्रबहादुरले प्लाष्टिकको झोलामा भने अर्को एका जोर सर्ट पाइन्ट समेत बोकेका थिए ।

मूलढोका बन्द गरेका भानुको ट्वाइलेटको छानामाथि चढी घरको भर्याङमा उक्लिएर चन्द्रबहादुर भानुको घरभित्र छिर्न सफल भएका थिए ।

प्रहरीको अनुसन्धानका क्रममा भानू नगरकोटीकै भर्याङमा राखिएको मासु काट्न प्रयोग गरिने दाउ फेला पारी सुरुमा भानुको कोठामा प्रवेश गरी भानु र उनकै श्रीमती रहेको आशंकामा दाउ प्रहार गर्दा झ्यालको सिसामार्फत भानू र उनकी श्रीमती नभई भान्जा रवीन्द्र नगरकोटी र भान्जी लुरी रहेको देखे ।

भान्जा–भान्जीको हत्या भएपछि फेरि भानू र उनकी श्रीमती खोज्दै अर्को तलामा  झरेका चन्द्रबहादुरले अर्को कोठामा हेर्दा बत्ती बलिरहेको र खाटमा धनकुमारी, भानू र भान्जी टुकुली सुतेको देखे । उनीहरूलाई पनि पालैपालो दाउले अन्दाधुन्दा प्रहार गरेर हत्या गरेका थिए । 

हत्या गर्दा लगाएको लुगा नजिकैको खोलामा फालेर अर्का लुगा लगाएर राति २ बजे घर फर्किएका थिए ।