काठमाडौं । ह्वाईट हाउसबाट बाहिरिएपछि अमेरिकी पूर्वराष्ट्रपति डोनाल्ड ट्रम्पले रुसी राष्ट्रपतिसँग सातपटक फोनमा गोप्य कुराकानी गरेको खुलासा भएको छ । यसबाहेक कोभिड–१९ महामारीका दौरान पनि ट्रम्पले गोप्य रूपमा रुसमा परीक्षण मेसिनहरू पठाएको खुलासा भएको छ ।

वाटरगेट काण्डको खुलासा गर्ने पत्रकार बब वुडवर्डको नयाँ किताब ‘वार’ अनुसार अमेरिकी राष्ट्रपति जो बाइडेन, इजारयली प्रधानमन्त्री बेन्जामिन नेतन्याहु र साउदी अरेबियाका युवराज मोहम्मद बिन सलमानसँग पनि निराश भएको कुरा किताबमा उल्लेख छ ।

अर्को साता सार्वजनिक हुने वुडवर्डको उक्त किताब एसोसिएटेड प्रेसले आफूले फेला पारेको दाबी गरेको छ ।

तर, ट्रम्पले भने एबीसी समाचारलाई दिएको अन्तर्वार्तामा आफूले रुसी राष्ट्रपतिसँग कुराकानी नगरेको बताएका छन् । उनले किताबका लेखक वुडवर्डलाई सम्बोधन गर्दै भनेका छन्, “उनी नराम्रो कथाकार हुन् ।”

ट्रम्पले सन् २०२१ मा वुडवर्डसँग ‘रेज’ नामक किताबका शिलशिलामा कुराकानी गरेका थिए । तर, किताब प्रकाशित भएपछि उनले वुडवर्डविरुद्ध मुद्दा हालेका थिए । त्यतिखेर ट्रम्पले आफूले गरेको कुराकानी सार्वजनिक गर्ने अनुमति नदिएको दाबी गरेका थिए । तर, प्रकाशक र वुडवर्डले भने ट्रम्पको दाबी गलत भएको बताएका थिए ।

ट्रम्पका सहयोगीको हवाला दिँदै सन् २०२४ को सुरुआतमा ट्रम्पले सातपटक रुसी राष्ट्रपतिसँग फोनमा कुराकानी गरेको किताबमा उल्लेख गरिएको छ । ट्रम्प र पुटिनबीच फोनमा के कुराकानी भयो भन्ने कुरा किताबमा लेखिएको छैन ।

तर, ट्रम्पका मुख्य सल्लाहकार र लामो समयदेखि उनका सहयोगी रहेका जेसन मिलरले भने किताबका लेखक वुडवर्डलाई ट्रम्पले पुटिनसँग कुरकानी गरेको थाहा नभएको बताएका छन् ।

सन् २०१६ को राष्ट्रपति चुनावी अभियानदेखि नै पुटिनसँग ट्रम्पको सम्बन्ध रहेको दाबी गरिन्छ । उक्त चुनावमा रुसले ट्रम्पलाई सघाएको आरोप पनि लाग्दै आएको छ । पछिल्लो समय अमेरिकाले युक्रेनलाई रुसविरुद्ध लड्न गरिरहेको सहयोगको आलोचना गरिरहेका छन् । 

ट्रम्पले सन् २०२० मा कोभिड–१९ भाइरस फैलिएपछि व्यक्तिगत प्रयोगका लागि भनेर पुटिनलाई भाइरस परीक्षण मेसिन पठाएको कुरा पनि किताबमा लेखिएको छ । एसोसिएटेड प्रेसले नै सन् २०२२ को मे महिनामा ट्रम्प नेतृत्वको प्रशासनले रुसलाई कोभिड–१९ महामारीका दौरान भेन्टिलेटरसहितका सामग्री पठाएको समाचार प्रकाशित गरेको छ ।