काठमाडौं । भारतमा सम्पन्न र्‍याली अफ हिमालयजको चौथो संस्करणअन्तर्गत रोयल इन्फिल्ड क्लासमा नेपाली राइडर दीपक साह विजयी भएका छन् ।

राइडर साहले असोज १६ देखि २० गतेसम्म भारतमा आयोजित र्‍याली अफ हिमालयजको चौथो संस्करणमा रोयल इन्फिल्ड हिमालयन ४११ चलाएर नेपालको प्रतिनिधित्व गरेका थिए । भारतको हिमाचल प्रदेशस्थित मनालीबाट रोहताङ पास, काजा र स्पिति भ्यालीसम्मको करिब ६०० किलोमिटर दूरीमा उक्त प्रतियोगिता आयोजना गरिएको थियो ।

टाइम, स्पिड र डिस्ट्यान्स (टीएसडी)का आधारमा र्‍याली अफ हिमालयजको विजेता छनोट गरिन्छ ।

एक कार्यक्रमबीच हिमालयन एक्स्ट्रिम मोटरस्पोर्ट्सका चिफ सुरेश रानाले राइडर साहलाई ट्रफी हस्तान्तरण गरे । ट्रफी प्राप्त गरेपश्चात् साहले आफू नेपालको प्रतिनिधित्व गर्दै विजयी बनेकामा खुसी व्यक्त गरे ।

उनले सन् २०१७ र २०१८ मा पनि रेड डी हिमालय भाग लिएका थिए । २०२२ मा र्‍याली अफ चाम्बामा समेत सहभागी भएका थिए ।

र्‍याली याली अफ हिमालयज संसारकै सबैभन्दा चुनौतीपूर्ण मोटरस्पोर्ट्स इभेन्टमध्ये एक हो ।