बेइजिङ । इजरायलले गएको महिनादेखि लेबनानमा तीव्र गोलाबारी गरेपछि चीनले आफ्ना २१५ नागरिकको उद्धार गरेको छ ।

लेबनानमा इजरायलले गरेको पछिल्लो आक्रमणमा शनिबारसम्म एक हजार १०० भन्दा बढी मानिसको मृत्यु भएको छ । यसै साता इजरायलले इरान समर्थित हिजबुल्लाहको पकड रहेको दक्षिणी लेबनानको केही भागमा आफ्नो सेनाले ‘स्थलगत आक्रमण’ गरेको जनाएको थियो ।

इजरायलले हालै लेबनानसँगको आफ्नो उत्तरी सीमाको सुरक्षामा ध्यान केन्द्रित गरेको छ । यहाँ हिजबुल्लाहले आफ्नो प्यालेस्टाइनी सहयोगी हमासको समर्थनमा आक्रमण सुरु गरेयता दैनिकजसो भिडन्त हुने गरेको छ ।

रुस, फ्रान्स, स्पेन, जर्मनी, बेलायतलगायत विभिन्न देशले पनि लेबनानबाट आफ्ना नागरिक फिर्ता गर्ने अभियान सुरु गरेका छन् ।

बेइजिङको विदेश मन्त्रालयले जारी गरेको विज्ञप्तिमा भनिएको छ, “चीन सरकारको संगठन र व्यवस्थाअन्तर्गत लेबनानबाट हालसम्म दुई समूहमा २१५ चिनियाँ नागरिकको सकुशल उद्धार गरिएको छ ।”

विज्ञप्तिमा अगाडि भनिएको छ, “लेबनानस्थित चिनियाँ दूतावासले लेबनानमा आफ्नो उद्धार अभियान जारी राखेको छ र त्यहाँ रहेका चिनियाँ नागरिकलाई सुरक्षा उपाय अपनाउन निर्देशन दिएको छ ।”

उद्धार गरिएका चिनियाँ नागरिकलाई कहाँ लगिएको भन्ने बारे मन्त्रालयले केही जानकारी गराएको छैन ।

लेबनानी अधिकारीहरूका अनुसार, सेप्टेम्बर २३ पछि इजरायली बमबारीमा वृद्धि भएयता लेबनानमा एक हजार ११० भन्दा बढी व्यक्तिको मृत्यु भइसकेको छ । १० लाखभन्दा बढी मानिस आफ्नो घर छोड्न बाध्य भएका छन् ।

इरानले इजरायलमाथि क्षेप्यास्त्र प्रहार गरेपछि चीनले बुधबार विश्वशक्ति राष्ट्रहरूसँग द्वन्द्वलाई थप अगाडि बढ्न नदिन पहल गर्न आग्रह गरेको थियो । रासस/एएफपी