काठमाडौं । इजरायलले एकैसाथ लेबनानमा हिजबुल्लाह, गाजामा हमास, यमनमा हुथी विद्रोहीबाहेक सिरिया र इरानको सामना गरिरहेको छ । न्युयोर्क टाइम्सले सन् १९६७ को अरब–इजरायल वारयताकै सबैभन्दा ठूलो युद्ध सुरु भएको जनाएको छ ।

गत वर्ष अक्टोर ७ मा हमासले गरेको आक्रमणको जवाफी कारबाहीमा उत्रिएको इजरायलले अहिले विभिन्न समूहको सामना गरिरहेको छ ।

इजरायल र हमासबीच युद्ध सुरु भएको एक वर्ष पुग्नै लाग्दा मध्यपूर्वको युद्ध अझ झाँगिएको छ मध्यपूर्वका प्रमुख शक्तिहरू नै युद्धमा हुमिएपछि विश्वव्यापीरूपमा चिन्ता बढिरहेको छ ।

पछिल्लोपटक अक्टोबर १ मा इरानले इजरायलमाथि आक्रमण गरेपछि मध्यपूर्वको युद्धले नयाँ रूप लिने निश्चित छ । पश्चिमा देशहरूको साथ पाएको इजरायलले पछिल्लो समय लेबनानको हिजबुल्लाहसँग लडिरहेको छ ।

इजरायलका प्रधानमन्त्री बेन्जामिन नेता न्याहुले भनेका छन्– हामीमाथि जसले आक्रमण गर्छ, हामी उनीहरूमाथि आक्रमण गर्छौं ।

अर्कोतर्फ अमेरिकाले इरानले गरेको आक्रमणको भर्त्सना गरेको छ । ह्वाइट हाउसले इरानले 'कठिन परिस्थितिको सामना गर्नुपर्ने' चेतावनी दिएको छ ।

गत वर्षको अक्टोबर ७ यताको निरन्तरको आक्रमणका कारण गाजामा ४१ हजार ७८८ जनाको ज्यान गइसकेको छ । यस्तै, ९६,७९४ जना घाइते भएका छन् । अक्टोबर ७ मा हमासले गरेको आक्रमणमा इजरायलमा झन्डै १२ सय जनाको ज्यान गएको थियो भने अन्य २०० जनालाई बन्दी बनाइएको थियो ।

हमासमाथिको आक्रमणको निरन्तर विरोध गर्दै आएका देश र समूहले अहिले इजरायलसँग युद्ध लडिरहेका छन् । पछिल्लोपटक इजरायलले लेबनानको हिजबुल्लालाई लक्षित गरेर आक्रमण थालेपछि इरान पनि युद्धमा उत्रिएको छ । अक्टोबर १ मा इरानले इजरायलमा एकैपटक २०० वटा मिसाइल खसाएको थियो ।

पछिल्लो समय इजरायली सेनाले लेबनानको राजधानी बेरुतको अन्तर्राष्ट्रिय विमानस्थलबाहिर ठूलो विस्फोट गराएको छ । लक्ष्य स्पष्ट नभए पनि विस्फोट गराइएको क्षेत्र हिजबुल्लाहको गढ मानिने दाहिहेको सिमाना रहेको बीबीसीले जनाएको छ ।

लेबनानी सेनाका अनुसार, देशको दक्षिणी क्षेत्रमा इजरायली सेनाले हिजबुल्लाहविरुद्ध आक्रमण जारी राखेको छ । आक्रमणका क्रममा लेबनानी सेनाका दुई जनाको ज्यान गएको छ । इजरायली सेनाले दक्षिणी लेबनानका २० सहर र गाउँहरू खाली गर्न निर्देशन दिएको छ ।

यस्तै, इजरायली वायुसेनाले हिजबुल्लाहको गुप्तचर मुख्यालय, हतियार उत्पादन साइट, हतियार भण्डारण क्षेत्रमा  हवाई आक्रमण गरेको छ ।

स्थानीय अधिकारीहरूका अनुसार, दुई हप्ताको अवधिमा इजरायलको आक्रमणमा लेबनानमा १,३०० भन्दा बढी व्यक्तिको मृत्यु भएको छ  । दश लाख भन्दा बढी विस्थापित भएका छन् । 

सेप्टेम्बर २७ मा इजरायलले राजधानी बेरुतमा रहेको हिजबुल्लाहको मुख्यालयमा ८० टन बमले आक्रमण गरेको थियो । जसमा हिजबुल्लाह प्रमुख नसरल्लाह मारिएका थिए । यस हमलामा नसरल्लाहबाहेक उनकी छोरी जैनबको पनि मृत्यु भएको थियो ।

यसअघि, इजरायलले हिजबुल्लाहका प्रमुख हसन नसरल्लाहका ज्वाइँ हसन जाफर अल कासिरलाई मारेको दाबी गरेको छ । समाचार एजेन्सी एएफपीले स्रोतलाई उद्धृत गर्दै इजरायली सेनाले बुधबार सिरियाको राजधानी दमास्कसमा हवाई आक्रमण गरेको थियो जसमा उनको मृत्यु भएको थियो । उनीसँगै थप दुई जनाको मृत्यु भएको छ ।

बीबीसीबाट ।