रियाद । रातको ९ बजे । थरिथरि रंगका बत्तीले आकाश चम्किरहेको दृष्य निकै परबाटसमेत देख्न सकिन्थ्यो । समारोहको परिदृष्य खिच्न आकाशमा दुई ड्रोन तैनाथ थिए ।

प्रहरीको एक टुकडीले आफ्नो कौशल देखाउँदै थियो । एक उँटको साथ एक व्यक्ति मञ्चअघि आए । उनको पछाडि एकजना आफ्नो मौलिक परम्परा झल्काउने आभूषणसहित बसिरहेका थिए । समय समयमा आकाशमा चम्किला अतिसबाजी हुँदै थियो । मञ्च पछाडिका स्क्रिनमा देशको खेलकुद इतिहास देखाइँदै थियो ।

बिहीबार राति मन नै रोमाञ्चित बनाउने दृष्य हो, साउदी गेम्स–२०२४ उद्घाटन समारोहको । यी र यस्तै दृष्य साउदी गेम्स तेस्रो संस्करणको उद्घाटन समारोहको करिब एक घण्टासम्म देखियो ।

“यस कार्यक्रमले साउदीले खेलकुदमा विशेष ध्यान दिइरहेको देखाउँछ । राज्यले भावी पुस्ताका लागि उत्कृष्ट खेलकुद वातावरण निमार्ण गर्न लगानी बढाइरहेको छ । यो सम्पूर्ण साउदीवासीका लागि गर्वको कुरा हो,” उद्घाटन समारोहमा उपस्थित एकजना स्थानीयले राज्यले खेलकुदमा बढाइरहेको लगानीप्रति सन्तुष्टि पोखे ।

प्रतियोगिताको उद्घाटन समारोहमा साउदीका राजकुमार, खेलकुदमन्त्री र राष्ट्रिय ओलम्पिक तथा पारालिम्पिक कमिटिका समेत अध्यक्ष रहेका अब्दुलाजिज बिन तुर्की अल फैसलले गरे ।

“साउदी गेम्सको तेस्रो संस्करणको आयोजना हुनुले बुद्धिमानी नेतृत्वको चासो र अनुगमन भएको प्रस्ट देखाउँछ,” फैसलले भने ।

विश्व खेलकुदको मानचित्रमा साउदीको इतिहास त्यति बलियो देखिँदैन । सन् १९७२ यता ओलम्पिकमा सहभागिता जनाइरहेको भए पनि साउदीले हालसम्म स्वर्ण पदक जित्न सकेको छैन । विश्व खेलकुदमा रहेको यही कमजोर उपस्थितिलाई चिर्न पछिल्लो समय साउदी अरेबियाले यसमा लगानी बढाइरहेकोमा दुईमत छैन । त्यसैको एक उदाहरणमा पर्दछ, साउदी गेम्स ।

राष्ट्रिय खेलकुद प्रतियोगिताको रूपमा रहेको यस प्रतियोगितामा ५३ खेलहरूमा प्रतिस्पर्धा भइरहेको छ । जसमा पाँच पारा खेलुकदसमेत समावेश छन् । प्रतियोगितामा प्रतिस्पर्धा बुधबारदेखि नै सुरु भए पनि यसको आधिकारिक उद्घाटन भने बिहीबार बलेबाद चिटीस्थित ओलम्पिक कमिटी परिसरमा भव्यरूपमा भएको हो ।

पछिल्लो समय विश्व खेलकुदमा घरेलु फुटबलबाट चर्चा कमाइरहेको साउदी देशको अर्थतन्त्र कच्चा तेलको उत्पादनबाट अन्य क्षेत्रमा विविधीकरण गर्न चाहन्छ । यसका लागि साउदीले सन् २०१६ को अप्रिलमा साउदी भिजन–२०३० को आधिकारिक सुरुआत गरेको थियो । 

यसको मुख्य उद्देश्य एक फलिफापपूर्ण अर्थतन्त्र, जीवन्त समाज र साउदीलाई महत्त्वाकांक्षी राष्ट्रको रूपमा परिचित गराउनु हो ।