काठमाडौं । प्रधानमन्त्री केपी शर्मा ओलीले बाढीपहिरोले यस्तो परिस्थिति आउला भन्ने अनुमान नगरिएको बताएका छन् । 

सिंहदरबारमा मंगलबार आयोजित पत्रकार सम्मेलनमा उनले पूर्वतयारी पहिले जसरी नै गरिएको सुनाए । “यसप्रकार परिस्थिति आउला, यस प्रकारको भौतिक, मानवीय क्षति होला भन्ने अनुमान थिएन । प्राकृतिक विपत्तिका लागि पूर्वतयारी यसअघिकै थियो । विपत्ति कत्रो आउँछ भन्न सकिन्नँ,” ओलीले भने । 

विपत्तिले राजनीतिक रंग र पेसा नछुट्याउने उनको भनाइ छ । “विपत्तिले राजनीतिक रंग, पेसा छुट्याएर मर्का पारेको हुँदैन । यो साझा कुरा हो । कमीकमजोरी कहीँ छन्, देखाउन सकिन्छ । सरकारले राम्रो काम गरेको होलान् । चार हजारभन्दा बढी मानिसलाई त सरकारले बचाएको छ,” उनले भने । 

विपद् राज्यको मात्रै विषय नभएको भनाइ उनको छ । ओलीले केही ठाउँमा ढिला भएको हुनसक्ने भन्दै जानीजानी लापरबाही नभएको विश्वास व्यक्त गरे । भूकम्प, कोभिडबाट भएको क्षतिबाट माथि उठेजसरी अहिले पनि माथि उठ्नुपर्ने बताए । संरचनाका कारण पनि समस्या रहेको भनाइ ओलीको छ । उनले एमाले पार्टी कार्यालय च्यासलको पुलबाट पानी नै बग्न नपाएकाले पनि समस्या गराएको बताए ।