काठमाडौं । नेकपा (माओवादी केन्द्र)ले बाढीपहिरोको क्षतिसम्बन्धी स्थानीय तह र प्रदेशबाट तथ्यांक संकलन गर्न केन्द्रीय कार्यालयमा 'हेल्प डेस्क' राख्ने भएको छ । अध्यक्ष पुष्पकमल दाहाल 'प्रचण्ड' निवास खुमलटारमा आज साँझ बसेको केन्द्रीय पदाधिकारी बैठकले 'हेल्प डेस्क' स्थापना गर्ने निर्णय गरेको हो ।

बैठकले मौसम पूर्वानुमान अनुसार, बाढीपहिरो र त्यसबाट हुन सक्ने क्षतिको आकलन हँदाहुँदै सरकारले जोखिम पहिचान र पूर्वतयारीमा ध्यान नदिँदा जनधनको क्षति बढेको निष्कर्ष निकालेको छ । 

बैठकले पार्टी सदस्य र निर्वाचित जनप्रतिनिधिहरूले राहत कोषमा आर्थिक जम्मा गर्ने र पार्टीपंक्तिलाई राहत पुनर्निर्माणमा केन्द्रित गर्ने पनि निर्णय गरेको छ ।

त्यस्तै, दीर्घकालीन पुनर्स्थापना र पुनर्निर्माणका लागि आवाज उठाउनेलगायत निर्णय पनि बैठकले गरेको छ।