काठमाडौं । ललितपुरको नख्खुखोलाको बाढीले बगाएपछि उद्धार गरिएका मध्ये एक बालिकाको उपचार पाटन अस्पतालमा भइरहेको छ ।

६ वर्षीया मेघना साहको एचडीयू (हाई डिपेन्डेन्सी युनिट)मा उपचार गरिएको थियो । हाल उनलाई वार्डमा सारिएको अस्पतालका प्रशासन प्रमुख तीर्थ भुजेलले जानकारी दिए ।

परिवारसँगै बाढीमा बगेकी उनको अवस्था सामान्य हुँदै गएको भुजेलले बताए । शनिबार खोलामा आएको बाढीमा उनको परिवारका चारजना परेका थिए । तीमध्ये तीनजनाको उद्धार गरिएको थियो ।

ललिततपुरकै लुभुमा बाढीमा परी घाइते भएका करिब ४५ वर्षीय जघनसिंह अन्सारीको उपचार पनि सोही अस्पतालको मेडिकल आईसीयूमा भइरहेको छ । उद्धारका क्रममा घाइते भएका उनको अवस्था भने जटिल रहेको भुजेलले जानकारी दिए ।

बाढीपहिरोमा परी घाइते भएका अरूको अवस्था उपचारपछि सामान्य भई ‘डिस्चार्ज’ भइसकेका छन् ।

बाढीपहिरोमा परी मृत्यु भएका १५ जनाको शव पाटन अस्पतालमा ल्याइएको थियो । तीमध्ये १२ जनाको शव पहिचान भएको छ । अरू पहिचानको क्रममा रहेको अस्पतालले जनाएको छ ।