काठमाडौं । अमेरिकी भलिबल खेलाडी ग्याब्रीएल बेन्डा नेपाल आएकी छिन् । उनी यहीँ असोज १४ देखि १९ गतेसम्म हुन लागेको वात्सल्य एभरेष्ट महिला भलिबल लिग (इडब्लूभिएल) २०२४ खेल्न नेपाल आइपुगेकी हुन् । उनले लिगमा कर्णालीको ‘कर्णाली यश्विज’ टिमलाई प्रतिनिधित्व गर्दैछिन् । 

ग्याब्रीएल बेन्डा शुक्रबार नेपाल आइपुगेकी हुन् । उनलाई स्वागत गर्न ‘कर्णाली यश्विज’ टिम त्रिभुवन अन्तर्राष्ट्रिय विमानस्थल पुगेको थियो । 

अमेरिकी खेलाडी ग्याब्रीएललाई केही समय अघिमात्र ‘कर्णाली यश्विज’ले आफ्नो टिममा अनुबन्ध गराएको थियो । कर्णालीमा ‘ट्रफी अनावरण’ सकिएको केही दिनमै यश्विज टिमले ग्याब्रीएललाई अनुबन्ध गराएको खबर सार्वजनिक गरेको थियो । ग्याब्रीएलभन्दा अघि बिहीबार ‘कर्णाली यश्विज’ टिमले अर्की आउटसाइड हिटर टर्किस खेलाडी जेनेप आउटर्यानलाई नेपालमा स्वागत गरेको थियो । 

नेपालमा पहिलोपटक हुन लागेको ‘एभरेष्ट वुमन भलिबल लिग (ईडब्लूभिएल)’ खेल्न आएकी ग्याब्रीएल अमेरिकाको घरेलु लिगमा परिचित खेलाडी हुन् । उनी अमेरिकाको राष्ट्रिय भलिबल खेलाडी हुन् ।

आज नेपाल आइपुगेकी ग्याब्रीएलले खेलकुद विकास र महिला भलिबलको उत्थान गर्ने मुल उद्देश्यको साथ सुरु भएको रमेश कर्पोरेसनले हेर्दै आएको ‘कर्णाली यश्विज’ टिममा आफू जोडिन पाउँदा निकै खुसी लागेको बताइन् ।  

इन्फिनिटी ड्रिम्सको आयोजनामा हुने ‘एभरेष्ट वुमन भलिबल लिग’ यही असोज १४ देखि १९ गतेसम्म त्रिपुरेश्वरस्थित दशरथ रंगशाला कभर्डहलमा हुँदै छ । लिगमा ६ टोलीको सहभागितामा हुनेछ । प्रशिक्षकमा कर्णाली यश्विज टिमबाट भलिबल महिला टोलीको प्रमुख प्रशिक्षक कुमार राई छन् । उनी ‘न्यु डाइमन्ड युथ स्पोट्स क्लब’को अध्यक्ष समेत हुन् ।

कर्णालीको टिमः
सुमित्रा रेग्मी, मीना सुनार, मनिषा चौधरी, यमुना रसाइली, सुनिता राई, सृष्टि खड्का, गरिमा बोहोरा र पशुपति बोहरा ।