काठमाडौं । चलचित्र ‘बलिदान’ दुई सातायता छायांकनमा छ । पूर्वी नेपालमा तयार पारिएको सेटमा चलचित्रको छायांकन भइरहेको छ । 

यो चलचित्रको छायांकनका लागि निर्माणपक्षले भारतबाट प्राविधिक ल्याएको थियो । भारतबाट क्यामेरासँगै साउन्ड र लाइटमा काम गर्ने प्राविधिक ल्याएको थियो । तर अहिले भारतबाट आएका केही प्राविधिकले ‘बलिदान’को सेट छोडेका छन् । 

क्यामेरा असिस्टेन्ट र दुईजना लाइटम्यानले ‘बलिदान’को सेट छोडिसकेको निर्देशक सन्तोष सेनले बताएका छन् । “सबै होइन केही प्राविधिकलाई हामीले निकालेका हौँ,” उनले बाह्रखरीसँग भने, “हामीले जे अपेक्षा गरेर ल्याएका थियौँ । त्यो नपाएपछि क्यामेरा असिस्टेन्ट र दुईजना लाइटम्यानलाई निकालेका हौँ ।” अन्य प्राविधिकले भने काम गरिरहेको उनले बताए । द्वन्द्व निर्देशक पनि सन्तोषले साउथबाट ल्याएका छन् । उनीहरूकै काम अहिले भइरहेको उनको भनाइ छ । 

महंगो बजेट खेर्चिएर बनाएको सेटमा अहिले एक्सन सिन भइरहेको छ । सौगात मल्लको एक्सन सिन भइरहेको उनले बताए । सेनका अनुुसार भोलि (बिहीबार)बाट समीर भट्टले सेट जोयन गर्नेछन् । 

फुलपातीका दिन समीरको अभिनय रहेको चलचित्र ‘१२ गाउँ’ रिलिज हुँदै छ । यसका लागि भने केही दिन सेड्युल मिलाएर समीरलाई प्रचारका लागि समय दिने सन्तोषले बताए । 

उनले द्वन्द्वनिर्देशक, छायाकार तथा अन्य प्राविधिकको टोली महँगो पारिश्रमिकमा भारतबाट ल्याएको समाचार आएको थियो । 

• ‘बलिदान’मा ३ करोड खर्चेर भारतबाट द्वन्द्वनिर्देशक र सिनेमेटोग्राफर ल्याउँदै सन्तोष 

चलचित्रको निर्देशन सन्तोष सेनले नै गरिरहेका छन् । उनको यो पहिलो सोलो निर्देशन हो । चलचित्रको कथालाई ‘महाकथा’ भन्दै यसका लागि आफूले जस्तोसुकै त्याग र बलिदान गर्न तयार रहेको बताएका छन् । 

‘बलिदान’को ६० प्रतिशत छायांकन स्टुडियोमा हुने बताइएको छ । बलिदान’को मुख्य भूमिकामा नेपाली चलचित्रका एक्सन नायक बिराज भट्टका छोरा समीरको अभिनय रहनेछ । चलचित्रमा अभिनेता सौगात मल्ल, अर्पण थापा, दिव्य देव तथा अभिनेत्री ऋचा शर्माको पनि अभिनय रहनेछ ।