काठमाडौं । देशका केही सानाठूला नदीमा आज पानीको बहाव उल्लेख्य बढ्ने अनुमान छ । नदीतटीय क्षेत्रमा सावधानी अपनाउन बाढी पूर्वानुमान महाशाखाले आग्रह गरेको छ ।

यस दिन झापा, इलाम, पाँचथर, डोटी, कैलाली, कञ्चनपुर, डडेलधुरा र आसपासका जिल्ला भई बहने अधिकांश साना नदीमा बहाव बढ्ने अनुमान छ । यी जिल्लाका केही साना नदीमा आकस्मिक बाढीको मध्यम जोखिम रहने महाशाखाको पूर्वानुमान छ ।

ताप्लेजुङ, संखुवासभा, ओखलढुंगा, सिन्धुली, काभ्रेपलाञ्चोक, मोरङ, सुनसरी, उदयपुर, भोजपुर, सोलुखुम्बु, दोलखा, रामेछाप, सिन्धुपाल्चोक, सिरहा, काठमाडौं, ललितपुर, भक्तपुर, मकवानपुर, नवलपरासी (बर्दघाट सुस्ता पूर्व), दाङ, कपिलवस्तु, रुपन्देही, गोरखा, लमजुङ, कास्की, तनहुँ, पाल्पा, अर्घाखाँची, प्युठान, रोल्पा, दैलेख, कालीकोट, अछाम र बाजुरा भई बहने केही साना नदीमा पनि बहाव बढ्ने अनुमान छ ।

आज र भोलि कोसी, नारायणी, कर्णाली, महाकाली र यसका सहायक नदीहरूको जलसतह सतर्कता तहभन्दा तलै रहने महाशाखाको पूर्वानुमान छ । यी दिन कन्काई, कमला, वाग्मती, पूर्वी राप्ती, पश्चिम राप्ती र बबई नदीको जलसतह पनि सतर्कता तहभन्दा तलै रहने तथा पर्सि उल्लेख्य बढ्ने महाशाखाले पूर्वानुमान गरेको छ ।