काठमाडौं । नेकपा (माओवादी केन्द्र)का अध्यक्ष एवं पूर्वप्रधानमन्त्री पुष्पकमल दाहाल ‘प्रचण्ड’ले संसद् अवरोधलाई जारी राख्ने बताएका छन् । शनिबार काठमाडौंमा आयोजित एक कार्यक्रममा उनले यस्तो बताएका हुन् ।

संविधान र शान्ति सम्झौताको मर्म, भावनाविपरीत हत्या, हिंसा भनिएकाले आफूहरू सदन अवरोधको स्थितिमा रहेको उनले उल्लेख गरे । उनले सदनबाट जबरजस्त ‘आक्रमण’ गर्ने चेतावनी दिए ।

“...हत्या हिंसा भनेर संविधान र शान्ति सम्झौताको मर्म, भावनाविपरीत, विस्तृत शान्ति सम्झौताविपरीत, हामी सदन अवरोधको स्थितिमा छौँ,” उनले भने, “र, हामी जबरजस्त त्यहाँबाट आक्रमण गरिरहेका छौँ । हामी छोड्दैनौँ ।”

उनले आफूहरू कमजोर छौँ भनेर हीन भावना लिनु सही नहुने बताए । “हामी अहिले प्रतिनिधिसभामा संख्यामा कमजोर नै छौँ, यो त दुनियाँले बुझेकै कुरा हो । तर, हाम्रो विरासतको कारणले, हाम्रा मुद्दाका कारणले, विस्तृत शान्ति सम्झौता, अन्तरिम संविधान र संविधानमा हाम्रो बारेमा गरिएको व्यवस्थाका कारणले हामी कमजोर छैनौँ । हामी कमजोर छौँ भनेर हीन भावना लिनु सही हुँदैन,” उनले भने ।

अध्यक्ष प्रचण्डले संवैधानिक परिषद्‌मा विपक्षीलाई कमजोर पार्न गरिएका चलाबाजी आफूहरूले असफल बनाएको जिकिर गरे । “सदनमा हेर्ने हो भने संवैधानिक परिषद्‌मा विपक्षीलाई कमजोर पार्न गरिएका चलाबाजीहरू हामीले असफल बनायौँ,” उनले भने । न्युज एजेन्सी नेपाल