काठमाडौं । आईसीसी क्रिकेट विश्वकप लिग–२ अन्तर्गत त्रिदेशीय शृंखलाको पहिलो खेलमा नेपालले घरेलु टिम क्यानडाविरुद्ध बलिङमा पकड बनाएको छ ।

सोमबार क्यानडाको किंग सिटीमा जारी खेलमा टस जितेर फिल्डिङमा आएको नेपालले पहिलो पावर प्ले (१० ओभर) को खेल सकिँदा एक विकेट लिएर २९ रनमात्र खर्चेको छ । 

नेपालका लागि ललितनारायण राजवंशीले एक विकेट लिए । क्यानडाबाट हाल क्रिजमा रहेका पर्गत सिंह र नवनित धलिवाल क्रमशः १० र आठ रनमा खेलिरहेका छन् ।

लिग–२ अन्तर्गत यसअघि घरेलु भूमिमा भएको त्रिदेशीय शृंखलामा खराब लयबाट गुज्रिएको नेपाल तालिकाको सातौँ स्थानमा छ । यसअघि नेपालले घरेलु मैदानमै खेलेका चार खेलमध्ये तीन खेलमा हार बेहोर्दा एक खेलमा मात्र जित निकालेको थियो ।

आठ टिममध्ये सातौँ स्थानको नेपालको खातामा दुई अंकमात्र छ । आजको खेलमा जित निकाले नेपाल तालिकाको छैटौँ स्थानमा उक्लिने छ । 

यता, तालिकाको शीर्ष तीनभित्र रहेको क्यानडाले भने लिग–२ मा मिश्रित नतिजा निकालेको छ । आठ खेलमध्ये चारमा जित र चार खेलमा हार बेहोरको क्यानडा आठ अंकसहित तालिकाको तेस्रो स्थानमा छ ।

क्यानडामा हुने शृंखलामा नेपाल, क्यानडा र ओमान सहभागी छन् । नेपालले आजको खेलपछि बुधबार ओमानसँग खेल्ने छ । यस्तै, नेपाले आइतबार पुनः क्यानडासँग र मंगलबार ओमानसँग खेल्ने तालिका छ ।