काठमाडौं । नेपाली नक्कली नेपाली नोटसहित ललितपुरबाट एकजना पक्राउ परेका छन् । पक्राउ पर्नेमा सिन्धुपाल्चोकको सुनकोसी गाउँपालिका–३ का ३१ वर्षीय महेश रोक्का छन् ।

जिल्ला प्रहरी परिसर ललितपुरको टोलीले उनलाई आइतबार (हिजो) सौगालबाट पक्राउ गरेको हो । रोक्काकै कोठाबाट पक्राउ गरिएको परिसरका एससपी नरेश सुवेदीले जानकारी दिए ।

कोठाभित्र फोटोकपी मेसिनमार्फत उनले नक्कली नोट छापेको खुलेको छ । उनको कोठाबाट एक हजार रुपैयाँ दरका ११५ थान नक्कली नोट बरामद गरिएको छ । रोक्कामाथि थप अनुसन्धान भइरहेको एसपी सुवेदीले बताए ।

यसअघि, गत वर्ष चैतमा ललितपुर प्रहरीले नै दुई लाखबराबरको नेपाली नक्कली नोटसहित तीनजनालाई पक्राउ गरेको थियो । त्यति बेला पक्राउ परेका करण प्रधान, सञ्जय अधिकारी र सविन हुमागाईं पुर्पक्षका निम्ति थुनामा छन् ।