काठमाडौं । राष्ट्रिय स्वतन्त्र पार्टी (रास्वपा)ले वाग्मती र विष्णुमतीको दायाँबायाँ ४० र टुकुचाको हकमा २० मिटर मापदण्ड तोकिएको विषयमा अनावश्यक राजनीति भइरहेको बताएको छ । 

सर्वोच्च अदालतको फैसला र महानगरको सूचनाका विषयमा तीन तहका सरकारबीच समन्वय गरेर समस्याको समाधान खोज्नुपर्ने रास्वपाले जनाएको छ । 

सर्वोच्च अदालतको फैसला पुनरवलोकनको वैधानिक बाटो बाँकी नै रहेकाले यसलाई अनावश्यक राजनीतिक मुद्दा बनाउन नहुनेमा जोड दिएको छ ।

“संघीय र स्थानीय सरकारबीच द्वन्द्व र विवाद बढाउन प्रोत्साहित गर्ने काम भइरहेको छ । यसले नदी/खोला किनार आसपासका बासिन्दालाई त्रसित बनाउने प्रवृत्ति गलत छ,” रास्वपाले विज्ञप्ति जारी गर्दै भनेको छ, “सरोकारवालासँग छलफल गरी संघीय र काठमाडौंका उपत्यकाभित्रका स्थानीय सरकारले साझा धारणा बनाएर सर्वोच्च अदालतमा पुनरवलोकनका लागि आग्रह गर्नु नै वैधानिक विकल्प हो ।”