काठमाडौं । अहिले त्रिभुवन अन्तर्राष्ट्रिय विमानस्थल भन्सार कार्यालयको प्रमुख रहेका महेश बराल अन्य दुई संस्थाको नेतृत्वमा पनि छन् । उनी राष्ट्रिय जीवन बिमा कम्पनी र नेपाल धितोपत्र बोर्डको अध्यक्ष पनि हुन् ।  

धितोपत्र बजारको नियामक निकाय धितोपत्र बोर्डमा अध्यक्ष भएर पनि काम अगाडि बढ्न सकेको छैन ।  एउटै व्यक्तिलाई तीनवटा जिम्मेवारी दिँदा तीनवटै निकायको काम प्रभावकारी नभएको अर्थकै अधिकारीहरू बताउँछन् ।

जेठ १३ गते राष्ट्रिय जीवन बिमा कम्पनीको अध्यक्ष नियुक्त भएका बराल साउन २ गते नेपाल धितोपत्र बोर्डको अध्यक्ष नियुक्त भए । त्रिभुवन अन्तर्राष्ट्रिय विमानस्थल भन्सार कार्यालयलाई महत्वपूर्ण कार्यालयको रुपमा लिइन्छ । 
भन्सार विभाग अन्तर्गतका कार्यालयमध्ये यो सबैको छनोटमा पर्छ । यस्तो महत्वपूर्ण जिम्मेवारी पाएका बराल एकाएक धितोपत्र बोर्डको अध्यक्ष हुन पुगे । 

हुन त अर्थ मन्त्रालयको सहसचिव धितोपत्र बोर्डको सदस्य हुने व्यवस्था छ ।  सरकारले बोर्डमा अध्यक्ष नियुक्त नगरेसम्म अर्थ मन्त्रालयबाट प्रतिनिधित्व गर्ने सदस्य अध्यक्ष हुने व्यवस्था छ । 

तर, गत पुस २० गते तत्कालीन अध्यक्ष रमेश हमालको कार्यकाल सकिएपछि बोर्डमा अर्थ मन्त्रालयका अधिकारी अध्यक्ष हुदै आएका छन् । उनीहरूले बोर्डले गर्नुपर्ने काम त गर्दैनन् । किनभने भोलि विवादमा परिन्छ भन्ने उनीहरूमा डर छ ।

तर बोर्डको अध्यक्ष चयन नगरी अर्थ मन्त्रालयले कर्मचारीलाई मात्रै जिम्मेवारी थुपारिदिँदा परिणाम शून्य रहेको बोर्डका एक उच्च अधिकारीको भनाइ छ । बोर्डका अध्यक्ष रहेका बराल अहिले एक टोली लिएर भारत भ्रमणमा छन् । उनले अर्थ मन्त्रालयका एक उप–सचिवसहित बोर्डका दुई सदस्य दलबहादुर अधिकारी र भोलानाथ ढुंगानालाई पनि लिएर भारत भ्रमणमा गएका छन् । 

टोलीमा बोर्डका कार्यकारी निर्देशक डा. नवराज अधिकारी र कृष्णराज पोखरेल पनि छन् । त्यसका साथै भ्रमणमा उपकार्यकारी निर्देशक निरन्जय घिमिरे, दीपा दाहाल, नरायणप्रसाद शर्मा र निर्देशक सानु खड्का पनि छन् ।

बराल अध्यक्ष भएको साढे एक महिना पूरा भएको छ । लामो समयदेखि प्राथमिक सेयर (आईपीओ) निष्कासन गर्दै बोर्डमा निवेदन दिएका कम्पनीहरुले स्वीकृति पाएका छैनन् । अहिलेसम्म यस्ता कम्पनीको लिष्ट लामो भइसकेका छन् ।

तर, बोर्डले ३४ कम्पनीको नाम लिष्टमा राखेको छ ।

आईपीओका साथै हकप्रद सेयर, ऋणपत्र, म्युचुअल फण्ड र एफपीओलाई पनि स्वीकृत दिन सकेको छैन ।