काठमाडौं । खाद्य व्यवस्था तथा व्यापार कम्पनीका कर्मचारीले साउनदेखि तलब पाएका छैनन् । चालु आर्थिक वर्ष २०८१/०८२ को दुई महिना सकिन लाग्दा यो सरकारी कम्पनीका कर्मचारीले साउनको तलब पाएका छैनन् ।

कम्पनीको सञ्चालक समितिको बैठक समयमा बस्न नसक्दा कर्मचारीहरू तलब नलिई काम गरिरहेका छन् ।

दसैँ नजिकिँदै जाँदा सहुलियत पसल सञ्चालन गर्नुपर्नेदेखि खसी तथा च्यांग्रा खरिद गर्ने कार्य बजेट पास नभएर अगाडि बढ्न नसकेको स्रोतको भनाइ छ ।

सरकार परिवर्तन भएसँगै सचिव फेर्ने प्रवृत्तिले यो कम्पनीको नियमित काममा प्रभाव परेको छ । केपी शर्मा ओली नेतृत्वको सरकार बनेको दुई महिना भएको छ । सरकार परिवर्तन भएसँगै सचिव पनि फेरिए ।

अहिले वाणिज्य सचिवमा मधु सुदन बुर्लाकोटी छन् । उनी खाद्य व्यवस्था तथा व्यापार कम्पनीका अध्यक्ष हुन् । उनी अध्यक्ष नियुक्त भए पनि कम्पनी सञ्चालक समितिको बैठक बसेको छैन ।

साउन २८ गतेको मन्त्रिपरिषद् बैठकले रमेश आचार्यलाई कम्पनीको महाप्रबन्धक नियुक्त गरेको हो । महाप्रबन्धक नियुक्त भएको एक महिना बितिसक्दा पनि आचार्यले बोर्ड बैठक राख्न सकेका छैनन् ।

कम्पनीका एक उच्च कर्मचारीका अनुसार गत वर्षको बजेटबाट २० प्रतिशत रकम तलब खुवाउन नयाँ बजेट पास नभएसम्म बोर्डबाट निर्णय गराउन सक्ने व्यवस्था छ । तर, नयाँ महाप्रबन्धक आचार्यले यस विषयमा पहल गर्न सकेका छैनन् ।