काठमाडौं । नेकपा (एमाले)का अध्यक्ष एवं प्रधानमनमन्त्री केपी शर्मा ओलीले स्वर्गीय सुवास नेम्वाङको नाममा केन्द्रीय प्रतिष्ठान बनाउने घोषणा गरेका छन् । बुधबार पार्टी कार्यालय च्यासलमा संविधानसभाका अध्यक्ष नेम्वाङको पहिलो स्मृतिसभामा त्यस्तो घोषणा गरेका हुन् ।

प्रतिष्ठानको नाम, को–को रहने भन्ने पूर्णता सचिवालय बैठबाट दिइने उनले बताए । ओलीले प्रतिष्ठान नेताहरूको आदर्शअनुसार चल्नसक्नुपर्ने पनि बताए ।

“प्रतिष्ठान बनायो, छोड्यो होइन । प्रतिष्ठान समातेर बस्यो केही नगर्‍यो होइन । नेताहरूको नामको प्रतिष्ठान नेताहरूको नामको आदर्श, विचार, हिँडेको बाटो, नेताहरूको आचारण, गतिशील इच्छा आकांक्षा र प्रवृत्ति अनुरूप चल्नुपर्दछ,” उनले भने ।

त्यसो भएमात्रै प्रतिष्ठानको औचित्य हुने ओलीको भनाइ छ । अहिले भएका निष्क्रिय प्रतिष्ठानलाई सक्रिय बनाउने बताए । 

नेताहरूको नामको प्रतिष्ठान देशका लागि नभएर कब्जा गरेको टिप्पणी ओलीको छ । उनले पुष्पलाल प्रतिष्ठान माधवकुमार नेपालले निजी सम्पत्ती जसरी लगेको भन्दै आपत्ति जनाए ।

“पुष्पलाल प्रतिष्ठान पार्टीले बनायो । खेलोफड्को गर्दै माधव नेपालजस्ता मान्छे अध्यक्ष भए । पार्टीलाई सरक्क छोड्नुपर्ने ठाउँमा निजी पोपर्टीजस्तो...,” ओलीले भने, “पुष्पलालजी फुट्नुभएको हो र ? माधव नेपाल पो फुट्या हो त । पुष्पलाल प्रतिष्ठान बोकेर लेर जाने ?”

उनले मदन भण्डारी अन्तर्राष्ट्रिय स्कुल खोलिएकामा पनि असन्तुष्टि व्यक्त गरे । “मदन भण्डारीका विचारहरू पढाउने, सिकाउने गरेर त्यसलाई दुरुपयोग गरेका छन्,” उनले भने ।

उनले कसैलाई कब्जा गरेर बस्न नदिइने बताए ।