काठमाडौं । आईसीसी क्रिकेट विश्वकप लिग–२ अन्तर्गतको शृंखलाका लागि क्यानडा जाने टोलीको बिदाइ गरेको छ ।

मंगलबार नेपाल क्रिकेट संघ (क्यान)ले एक कार्यक्रमबीच नेपाली टिमको बिदाइ गरेको हो । नेपाली टिमलाई क्यानका सचिव पारस खड्का, प्रवक्ता छुम्बी लामा, क्रिकेट म्यानेजर विनोद दास, राष्ट्रिय खेलकुद परिषद् (राखेप)का सदस्यसचिव टंकलाल घिसिङ लगायतको उपस्थितिमा बिदाइ गरिएको हो ।

सेप्टम्बर १६ देखि २० सम्म हुने एकदिवसीय शृंखलामा नेपाल, घरेलु टोली क्यानडा र ओमान छन् ।

नेपालले सेप्टेम्बर १६ मा क्यानडासँग खेल्दै शृंखलाको सुरुआत गर्नेछ । नेपालले सेप्टेम्बर १८ मा ओमान, २२ मा क्यानडा र २४ मा ओमानको सामना गर्नेछ ।

एकदिवसीय शृंखलापछि यी तीनै टोली सम्मिलत ट्वान्टी–२० अन्तर्राष्ट्रिय शृंखला पनि हुनेछ । शृंखलामा नेपालले सेप्टेम्बर २८ र अक्टोबर १ मा क्यानडा तथा सेप्टेम्बर २९ र अक्टोबर २ मा ओमानसँग खेल्नेछ ।

त्यसपछि नेपाल लिग–२ नै खेल्न अमेरिका प्रस्थान गर्नेछन् । अमेरिका, नेपाल र स्कटल्यान्डबीच त्रिकोणात्मक र ट्वान्टी–२० दुवै शृंखला हुनेछ ।

बिदाइ कार्यक्रममा क्यानले यो भ्रमणका लागि जगत टमाटालाई सल्लाहकार प्रशिक्षकमा नियुक्त गरेको जानकारी दिएको छ ।

नेपालले पहिलो शृंखला कीर्तिपुरस्थित त्रिवि क्रिकेट मैदानमा खेलेको थियो थियो । उक्त शृंखलामा नामिबियासँग दुवै खेल हारेको नेपालले नेदरल्यान्ड्ससँग समान एक जित र हारको नतिजा निकालेको थियो ।