काठमाडौं । नेपाल उद्योग वाणिज्य महासंघका अध्यक्ष चन्द्रप्रसाद ढकालले देशमा आर्थिक सुधारको आधार तयार हुँदै गरेको बताएका छन् । सोमबार महासंघको सचिवालयमा अन्तर्राष्ट्रिय वित्त निगमका दक्षिण एसिया क्षेत्रीय निर्देशक इमाद फाखौरीसँगको भेटका क्रममा उनले यस्तो बताएका हुन् ।

सरकारले नेपाल उद्योग वाणिज्य महासंघले दिएको सुझाव ग्रहण गरेको र नयाँ पुस्ताका सुधार अघि बढाएको उनले उल्लेख गरे । ढकालले सरकार, निजी क्षेत्र र अन्तर्राष्ट्रिय विकास साझेदारले हातेमालो गरेर आर्थिक वृद्धिलाई प्रवर्द्धन गर्न सकिने बताए ।

अन्तर्राष्ट्रिय वित्त निगमको विशेषज्ञता र महासंघको स्थानीय व्यवसाय समुदायसँगको सशक्त सम्बन्धले नेपालको आर्थिक परिदृश्यमा परिवर्तन ल्याउन महत्त्वपूर्ण प्रगति गर्न सकिने उनले विश्वास व्यक्त गरे ।

फाखौरीले सार्वजनिक–निजी साझेदारीमा थप जोड दिन आवश्यक रहेको बताए । नेपालले केही आर्थिक चुनौतीको सामना गरिरहेको भए पनि देशका निम्ति धेरै अवसर रहेको उनले उल्लेख गरे ।