काठमाडौं । प्रहरी प्रधान कार्यालयले प्रहरी नायब उपरीक्षक (डीएसपी) हेमबहादुर शाहीमाथि छानबिन सुरु गरेको छ । ‘विवादित छवि’का कालिकोटका महेन्द्रजंग शाहसँगको सम्बन्धबारे प्रहरी प्रधान कार्यालयले छानबिन थालेको हो ।

प्रहरीको अन्तर्राष्ट्रिय अपराध संगठन (इन्टरपोल) को नेसनल सेन्ट्रल ब्यूरो (एनसीबी) सिंगापुरले नेपाल प्रहरीको एनसीबी काठमाडौंलाई कालिकोटका महेन्द्रजंग शाह, कालिकोटकै दिपेन्द्रबहादुर शाह र कैलाली घर भएका हेमबहादुर शाहीको पृष्ठभूमि जानकारी गराउन पत्राचार गरेको थियो ।

• ‘आतंकवाद क्रियाकलाप’मा संलग्न रहेको आशंकामा डीएसपीसहित तीन नेपालीको पृष्ठभूमि माग्यो सिंगापुर प्रहरीले

सिंगापुर प्रहरीले महेन्द्रजंग शाहमाथि आतंकवादी संगठन स्लामिक स्टेट अफ इरान र सिरिया (आइएसआएस) को गतिविधिमा संलग्न रहेको आरोपमा निगरानी गरिहेको र त्यही विषयमाथि बुझ्न पत्राचार गरेपछि प्रहरी प्रधान कार्यालयले छानविन थालेको हो ।

प्रहरी नायव महानिरीक्षक (डीआईजी) दानबहादुर कार्कीले महेन्द्रजंगसँगका सम्बन्धबारे छानबिन सुरु भइसकेको जानकारी दिए । उनले भने, “हामीले सोधपुछ र छानबिन गरिरहेका छौं । उनीहरूको सम्बन्ध नातेदार वा अन्य कुन प्रकारको हो त्यो हेर्दै र्छौै । केही कमजोरी देखियो भने कारबाहीको दायमा त आउनैपर्छ ।”

एनसीबी सिंगापुरले २९ जुलाई २०२४ मा एनसीबी काठमाडौंलाई पत्राचार गरेको थियो ।   एनसीबी सिंगापुरले महेन्द्रको आर्थिक पाटोसमेत अस्वाभाविक देखिएको जनाएको छ ।

महेन्द्रजंग लामो समयदेखि दुबई र मलेसिया बस्दै आएका छन् । उनी २०१५ मा मलेसियाको गैरआवसीय नेपाली संघ (एनआरएनए) को अध्यक्ष समेत हुन् । उनी त्यतिबेला मलेसियाबाट निकालिएका थिए ।

उनीमाथि नेपालमा समेत वैदेशिक रोजगारीको प्रलोभन देखाउँदै ठगी गरेको उजुरी प्रहरीमा छ ।  उनै शाहसँग केही समय अघि सिंगापुरमा डीएसपी शाही समेत घुमफिर गर्न पुगेपछि सिंगापुर प्रहरीले उनको क्रियाकलाप माथि समेत चासो देखाएको हो ।

त्यसो त, डिएसपी शाहीले विदा स्वीकृत गरेपनि विदेश जानेबारे भने प्रहरी प्रधान कार्यालयलाई कुनै जानकारी नगराई गएको देखिएको छ । प्रहरी निरीक्षकभन्दा माथिका अधिकारीले विदा लिएको समयसमेत विदेश जानुपरेमा माथिल्लो कार्यालयलाई जानकारी दिएर मात्रै जानुपर्ने व्यवस्था छ ।

के भन्छन् डीएसपी शाही ?
डीएसपी हेमबहादुर शाहीले भने महेन्द्रजंग शाहको पुरानो पृष्ठभूमिबारे आफूलाई जानकारी नहुँदा मलेसियामा भेटेको बताए । 
उनले भेटबारे यसरी बताए–
म आफ्नै प्याकेजअनुसार १४ जुनदेखि २४ जुनसम्म बैंकक, सिंगापुर र मलेसिया घुम्ने योजना बनाएर गएको थिएँ । म घुम्न जाने योजनाबारे चिनजानका साथी दिपेन्द्र शाहलाई जानकारी थियो । उहाँ हाम्रो प्याकेजमा नगए पनि उनी सिधै मलेसिया जानु भयो ।
म बैंकक घुमेपछि भने दिपेन्द्र शाहले नै सिंगापुर होइन, पहिला मेलेसिया घुमौँ, यता महेन्द्र दाइ पनि हुनुहुन्छ भनेर बोलाउनुभयो । म सिंगापुर नगइ मलेसिया पुगेँ । मलेसिया महेन्द्रकै घरमा बसिएको हो । उहाँले नै घुमफिर गराउनुभयो ।
त्यो पाहुनाका हिसाबले स्वाभाविक हो जस्तो लाग्छ । 
मलेसियाबाट हामी सडकमार्ग हुँदै सिंगापुर घुम्न गएका थियौंं । तर, सिंगापुरको अध्यागमनले हामीलाई प्रवेश दिएन, हामी फिर्ता भयौं । महेन्द्रकाबारेमा मलाई अध्यागमनमै सोधेको थियो । मेरो भाइ हो भनेर फर्किएका हौंै । उसको आतंकवादसँग के सम्बन्ध छ वा कसैले उजुरीमात्रै दिए त्यो मलाई थाहा हुने कुरा भएन । त्योबारे मलाई कुनै जानकारी छैन ।