रसुवा । भारी वर्षासँगै खसेको पहिरोका कारण अवरुद्व भएको रसुवाको पासाङल्हामु मार्ग सञ्चालनमा ल्याइएको छ । सडकमार्ग सञ्चालनमा ल्याइएसँगै ग्राङ र ठाडेबीच मूलखर्क भन्ने स्थानमा अलपत्र यात्रुवाहक बसलगायत सयौँ सवारीसाधन आफ्नो गन्तव्यतर्फ गइसकेका छन् ।

शुक्रबार रातिको वर्षाका कारण पहिरोसँगै बगेको ढुंगा सडक सतहमा थुप्रिएको थियो । नुवाकोटदेखि स्काभेटरसहितको ब्रेकर झिकाई दिनभरको प्रयासबाट ढुंगा फुटालेर सडक सफा गरी पूर्ण रूपमा सवारी आवागमन सञ्चालन गरिएको प्रमुख जिल्ला अधिकारी वेदनिधि खनालले बताए ।

सडक सञ्चालनसँगै चीनको मानसरोवर कैलाश र रसुवाको गोसाइँकुण्ड जाने यात्रु तथा स्थानीय नागरिक र चिनियाँ सामान आयातका निम्ति ढुवानी गर्ने कन्टेनर आफ्नो गन्तव्यतर्फ गइसकेका ट्राफिक प्रहरीले जनाएको छ ।

सशस्त्र प्रहरी, नेपाल प्रहरीले पहिरोस्थलमा दिनभर ओहोरदोहोर गर्ने यात्रुलाई सहजीकरण गरेका जनाइएको छ । रासस