काठमाडौं । घरेलु कामदारको रूपमा राखेकी १७ वर्षीया बालिकालाई तीन वर्षदेखि जबरजस्ती करणी गरिरहेको आरोपमा एकजना पक्राउ परेका छन् । 

कुलेश्वर आवासीय क्षेत्रबाट एकजना ५४ वर्षीय पुरुषलाई पक्राउ गरिएको हो । उनको परिचय भने खुलाइएको छैन ।

काठमाडौं महानगरपालिकाले सञ्चालन गरेको बाल श्रमविरुद्धको अभियानमा आएको जानकारी अनुसार, ती पुरुषले विगत ६ वर्षदेखि ती बालिकालाई घरेलु कामदारका रूपमा राखेका थिए ।

काठमाडौं महानगर, बाल हेल्पलाइन, बालबालिका खोज तलास केन्द्र १०४ र राष्ट्रिय बाल अधिकार परिषद्को संयुक्त अनुगमन तथा जाहेरी प्रतिवेदनका आधारमा उनलाई निवासबाटै पक्राउ गरिएको प्रहरीले जनाएको छ ।