काठमाडौं । इजरायली प्रधानमन्त्री बेन्जामिन नेतन्याहूले शनिबार गाजामा मृत फेला परेका ६ बन्धकलाई फिर्ता गर्न असफल भएकामा आफ्ना नागरिकसँग माफी मागेका छन् ।

अर्कोतर्फ, युद्धविराम सम्झौता नभए अरू बन्धक पनि ‘कफन लगाएर घर फर्कने’ प्यालेस्टाइनी लडाकु समूह हमासले चेतावनी दिएको छ ।

हमाससँग वार्ता गर्ने उनको तरिकालाई लिएर इजरायलमा दोस्रो रात पनि विरोध प्रदर्शन जारी रहेका बेला नेतन्याहूले माफी मागेका हुन् ।

यस्तै, बेलायतले अन्तर्राष्ट्रिय कानुन उल्लंघन गर्न प्रयोग हुन सक्ने भन्दै इजरायललाई थप हतियार दिन प्रतिबन्ध लगाएपछि दबाब बढ्दै गएको छ ।

तर, इजरायली प्रधानमन्त्री अझै आफ्नो अडानमा अडिग छन् । गाजाको फिलाडेल्फिया कोरिडोरलाई इजरायली सेनाले नियन्त्रणमा लिन आवश्यक रहेकामा उनले जोड दिएका छन् । हमाससँगको वार्तामा यो करिडोर प्रमुख मुद्दा बनेको छ ।

हजारौँ इजरायली सोमबार पनि सडकमा उत्रिए । बन्धकका परिवारले नेतन्याहूले आफ्ना प्रियजनलाई ११ महिनापछि पनि घर फर्काउन नसकेकामा आक्रोश व्यक्त गर्न प्रदर्शनको आह्वान गरेका थिए ।

टाइम्स अफ इजरायलका अनुसार, जेरुसेलममा प्रधानमन्त्री निवासबाहिर प्रदर्शनका क्रममा प्रहरीले ठूलो मात्रामा बल प्रयोग गरेको छ । प्रदर्शनकारीलाई बलपूर्वक पछाडि धकेलिएको छ । कतिपयलाई जमिनमा लडाइएको र धेरै प्रदर्शनकारीलाई घिसारिएको थियो ।

उक्त अखबारका अनुसार, एक प्रहरीले टाइम्स अफ इजरायलका पत्रकारको घाँटी थिचेर हत्या गर्ने प्रयास गरेका थिए ।

गएको आइतबार लाखौँ मानिस इजरायलभर सडकमा उत्रिएका थिए । तीमध्ये केही प्रदर्शनकारीले तेल अभिभको मुख्य राजमार्ग बन्द गरेका थिए ।

प्रदर्शनकारीले इजरायली झन्डा बोकेका थिए र पहेँलो रिबन लगाएका थिए । यो रिबन बन्धकसँग एकताको प्रतीक हो ।

गत वर्ष अक्टोबर ७ मा अपहरणपछि कुल ९७ इजरायली बन्धक अझै बेपत्ता छन् ।

इजरायलबाट सैन्य दबाब जारी रहे बन्धकलाई कफनमा फिर्ता गरिने सोमबार हमासका तर्फबाट चेतावनी दिइएको छ । बीबीसीबाट ।